«ԳԱԼԱ»-ի սեփականատեր Վահան Խաչատրյանը Aravot.am-ի հետ զրույցում տեղեկացրեց, որ քաղաքական գովազդի գներն իր հեռուստաընկերությունում մնացել են անփոփոխ` թե՛ նախորդ և թե ՛առաջիկա ընտրություններում մեկ րոպեն արժե 10 հազար դրամ: Մեր այն հարցին` մի քիչ թանկ չէ՞ որոշ թեկնածուների ու կուսակցությունների համար, թե ինքն էլ է կարծում` էլ ի՞ նչ պատգամավորի թեկնածու, եթե գրպանը կոպեկ չկա, մեր զրուցակիցն այսպես արձագանքեց. «Չէ, նման բան չեմ կարծում, բայց ասեմ, որ թանկ չէ, որովհետև հիմա օրենքը լիմիտավորված է, մեկ հոգուն 6 րոպեից ավելի եթեր տալու իրավունք չունենք: Իհարկե մեր գները կարող էին ավելի թանկ լինել, բայց մենք ըմբռնումով մոտեցանք, այնպիսի գին սահմանեցինք, որ բոլոր քաղաքական ուժերը կարողանան օգտվել մեր գովազդից, կարծում եմ 10 000 դրամը մատչելի է»:
Իսկ եթեր տրամադրելիս անձնական վերաբերմունքը որևէ դերակատարություն կունենա՞, հնարավո՞ ր է ԳԱԼԱ-ի սեփականատերը խիստ հակակրանք կամ շահերի բախում ունենալով որևէ թեկնածու կամ քաղաքական ուժի հետ, հրաժարվի եթեր տրամադրելուց: «Ճիշտ ասած ես շատ խիստ հակակրանք ունեմ ոչ թե որևիցէ մեկի, այլ շատերի նկատմամբ, բայց ամեն ինչ անում եմ, որպեսզի իմ անձնական վերաբերմունքը, դիրքորոշումը չազդի իմ աշխատակազմի վրա, և երևի արդեն տեսել եք մեր աշխատաոճը, մեր լրագրողները աշխատում են անկախ իմ դիրքորոշումից, այն իրենց վրա չի ազդում, ինչքան որ ստացվում է, դուք ինքներդ պիտի դատեք», -ասաց ժամանակին շատերի կողմից հալածված հեռուսատատեսության սեփականատերը:
Նունե ԱՐԵՎՇԱՏՅԱՆ
