Ինչպես արդեն տեղեկացրել ենք, Human Rights Defense իրավապաշտպան կազմակերպությունը փորձագիտական ուսումնասիրության էր ենթարկել Ոստիկանության անձնագրային և վիզաների վարչության գրությունը` Խաչատուր Սուքիասյանին Էրեբունու անձնագրային բաժանմունքի կողմից 03.03.2012թ. տրամադրված տեղեկանքը չեղյալ հայտարարելու վերաբերյալ և հանգել է այն եզրակացության, որ պետական կառավարման վերոնշյալ մարմնի կողմից կայացվել է ակնհայտ ապօրինի և անհիմն որոշում: Կազմակերպության եզրահանգման վերաբերյալ ԿԸՀ նախագահ Տիգրան Մուկուչյանը Aravot.am-ին ասաց, որ տեղյակ չէ, թե այդ կազմակերպությունը ինչ չափանիշներով է քննել ու ինչ իրավասությամբ է դիմումի վերաբերյալ իրավական դիրքորոշումներ ներկայացրել .«Որեւէ տեսակետ չեմ կարող հայտնել նշված կազմակերպության կողմից իրականացված դատողությունների մասին, որովհետեւ նշված հարցի լուծման իրավասությունը պատկանում է բացառապես ընտրատարածքային ընտրական հանձնաժողովին»:
Արփինե ՍԻՄՈՆՅԱՆ
