Ինչպես արդեն տեղեկացրել էինք, այսօր ԿԸՀ-ն մերժեց Խաչատուր Սուքիասյանի դիմումով վարչական վարույթ հարուցելը: Հանձնաժողովի նախագահ Տիգրան Մուկուչյանը մինչեւ մերժումը հրապարակելը ընթերցեց ոստիկանության տեղեկանքը, որով կասկածի տակ էր առնվել պատգամավորի թեկնածու Խ. Սուքիասյանի՝ վերջին 5 տարիներին Հայաստանում մշտական բնակության փաստը:
Քննարկմանը ներկա Խ. Սուքիասյանի փաստաբան Արա Զոհրաբյանն ասաց, որ իր վստահորդը նման դիմում է հանձնաժողովին ուղարկել՝ նպատակ ունենալով հանձնաժողովին հայտնել որպես ի գիտություն:
Պարոն Մուկուչյանն էլ ասաց, որ, ըստ կանոնակարգի, ԿԸՀ-ն պարտավոր էր քննել դիմումը, ու եթե 5 օրվա ընթացքում չքններ, ապա իրենց կմեղադրեին անգործության մեջ: Խ. Սուքիասյանի իրավապաշտպանն ասաց, որ համակարծիք է ԿԸՀ-ի իրավական դիրքորոշումների հետ, իսկ քննարկումից հետո լրագրողների հետ զրույցում մանրամասնեց. «Թիվ 10 ընտրատարածքային ընտրական հանձնաժողովը պետք է որոշի՝ Խաչատուր Սուքիասյանին գրանցո՞ւմ է, թե՞ ոչ: Այսօրվա քննարկման ժամանակ Կենտրոնական ընտրական հանձնաժողովը չէր կարող որոշում կայացնել Խաչատուր Սուքիասյանի դիմումով, ինչու՞, որովհետեւ , եթե որոշեր Սուքիասյանի դիմումը պետք է մերժի, ապա կստացվեր դրանով կկանխորոշեր ստորադաս ընտրատարածքային ընտրական հանձնաժողովի որոշումը, եթե որոշեր, որ պետք է դիմումը բավարարի… իսկ այդ լիազորությունները չուներ»:
Կարդացեք նաև
Արփինե ՍԻՄՈՆՅԱՆ
