Ռադմիլա Շեկերինսկան (կենտրոնում) Մակեդոնիայի խորհրդարանի նիստի ժամանակ, Սկոպյե, հունիս, 2011թ.
Մայիսի 6-ի խորհրդարանական ընտրություններում ԵԱՀԿ-ի Ժողովրդավարական հաստատությունների եւ մարդու իրավունքների գրասենյակի (ԵԱՀԿ/ԺՀՄԻԳ) դիտորդական առաքելությունը կղեկավարի Ռադմիլա Շեկերինսկան: Հինգշաբթի օրը Երեւանում նրան կընդունի Հայաստանի արտգործնախարար Էդվարդ Նալբանդյանը, «Ազատություն» ռադիոկայանին տեղեկացրեց արտգործնախարարության մամուլի խոսնակ Տիգրան Բալայանը:
Թե ինչ կազմով են Երեւանում գործունեություն ծավալելու իր դիտորդները` որոշում է ԵԱՀԿ/ԺՀՄԻԳ-ը, Հայաստանը միայն հրավեր է ուղարկում:
Այս կազմակերպությունից հայաստանյան խորհրդարանական ընտրությունները կդիտարկեն 24 երկարաժամկետ եւ 250 կարճաժամկետ դիտորդներ։
Դիտորդական խմբի ղեկավար Ռադմիլա Շեկերինսկան 40 տարեկան է, միջազգային հարաբերություններ է ուսանել Թաֆթսի համալսարանի Ֆլեթչերի դիվանագիտության եւ իրավաբանության դպրոցում:
Կարդացեք նաև
2004 թվականի նոյեմբեր-դեկտեմբերին նա եղել է Մակեդոնիայի վարչապետի պաշտոնակատարը: Եղել է փոխվարչապետ, զբաղվել է եվրոպական ինտեգրացիայի հարցերով:
1998 թվականին 26 տարեկանում նա ամենաերիտասարդ պատգամավորն էր խորհրդարանում։
Շեկերինսկան գլխավորել է «Սոցիալ-դեմոկրատական միություն» կուսակցությունը, եղել է ընդդիմադիր ամենախոշոր կուսակցության առաջնորդը Մակեդոնիայի խորհրդարանում։
2009 թվականին նա գլխավորել է դիտորդական առաքելությունը Ղրղըզստանի նախագահական ընտրություններում:
«Ազատություն» ռադիոկայան
