«Յուրահատուկ» դիրքորոշում ունի մեր ԿԸՀ-ն: Նրա ղեկավարը՝ Տիգրան Մուկուչյանը, մի քանի օր առաջ «Ազատություն» ռադիոկայանի թղթակցին ասել է. «Այդ այցելությունները որակում եմ որպես նաեւ գաղափարների տարածում, եւ այլն, եւ այլն: Պետք է նկատի ունենանք հետեւյալը, որ Ընտրական օրենսգրքի տեսանկյունից եթե մենք նայում ենք, Ընտրական օրենսգիրքը սահմանում է մի բան՝ նախընտրական քարոզչության ժամանակահատված, որի ընթացքում սահմանափակումներ են սկսում կիրառվել ամենատարբեր բնույթի: Իսկ եթե նախընտրական քարոզչության ժամանակահատվածից դուրս է իրականացվում այդ գործունեությունը, հետեւաբար՝ այս գործունեությունը ընդհանրապես չի կարող որակվել որպես նախընտրական քարոզչության կամ սահմանված կարգի խախտում»: Ինչպես կռահեցիք, նա խոսում է վարչապետի քարոզչական այցերի մասին եւ, փաստորեն, հաստատում, որ մեր կառավարությունը պետական միջոցների հաշվին զբաղվում է կուսակցական քարոզչությամբ:
Պարոն Մուկուչյանը իր շեֆերին արդարացնում է՝ հղում կատարելով ընտրական օրենսգրքին: Այնուամենայնիվ, նույն ընտրական օրենսգիրքն է սահմանում քարոզչության հավասար պայմաններ: Այսինքն՝ օրենքի խախտում է ե՛ւ պաշտոնական դիրքի չարաշահումը, ե՛ւ պետբյուջեի միջոցները հօգուտ մեկ կուսակցության մսխելը: Իսկ հեռուստաընկերությունները միջոցներ եւ եթերաժամանակ են վատնում իշխող ուժին սատարելու համար:
Զ. ԳԱԲՐԻԵԼՅԱՆ
«Չորրորդ ինքնիշխանություն»
