«Ադրբեջանի իշխանությունները պետք է անկախ հետաքննության ենթարկեն ոստիկանության կողմից բողոքի ցույցի ընթացքում կատարումներով հանդես եկող երաժիշտներին դաժան ծեծի ենթարկելու մասին մեղադրանքները»:
Այս հայտարարությամբ երեքշաբթի օրը հանդես է եկել «Amnesty Internaitonal» իրավապաշտպան կազմակերպությունը՝ նշելով, որ 24-ամյա երաժիշտ Ջամալ Ալին, երաժշտական խմբի բաս-կիթառահար Նաթիգ Քամիլովը, ինչպես նաև անցյալ շաբաթ օրն անցկացված իրադարձության կազմակերպիչ, 25-ամյա Էթիբար Սալմանլին ձերբակալվել են այն բանից հետո, երբ Ջամալ Ալին կատարման ընթացքում վիրավորել է Ադրբեջանի նախագահ Իլհամ Ալիևի հանգուցյալ մորը:
Այս իրադարձությունից հետո, ըստ իրավապաշտպանների, դատարանը որպես «մանր խուլիգանություն» է որակել ձերբակալվածների գործողությունները՝ դատապարտելով վերջիններիս հինգից տասը օր վարչական կալանքի:
«Ոստիկանության կողմից շաբաթ օրն անցկացված բողոքի խաղաղ ցույցի մասնակիցների նկատմամբ իրականացված բռնի հարձակումը պետք է անհապաղ և մանրամասն հետաքննվի անկողմնակալ մարմնի կողմից, իսկ մեղավորները պետք է պատասխանատվության ենթարկվեն», – ասել է Եվրոպայի և Կենտրոնական Ասիայի գծով «Amnesty International»-ի փոխտնօրեն Ջոն Դալհուզենը:
Կարդացեք նաև
«Amnesty International»-ի վկայությամբ, Ջամալ Ալին ու Նաթիգ Քամիլովը զրկված են իրենց ընտանիքների և փաստաբանների հետ հաղորդակցվելու հնարավորությունից: Իրենց գործով դատական նիստի ժամանակ Ալին ու Քամիլովը հայտնել են ոստիկանությունում կալանքի տակ գտնվելու ընթացքում կրկին ծեծի ենթարկվելու մասին:
Ըստ իրավապաշտպանների, Ադրբեջանի իշխանությունները, բողոքի ցույցերն արգելելու և դրանց կազմակերպիչներին ու մասնակիցներին ձերբակալելու միջոցով ըստ էության քրեականացրել են երկրի քաղաքների կենտրոնում հակակառավարական խաղաղ ցույցերի անցկացումը:
«Հեգնական է, որ Բաքվում «Եվրատեսիլ»-ի մեկնարկից ընդամենը երկու ամիս առաջ Ադրբեջանի իշխանություններն ուժ են կիրառում՝ քաղաքի փողոցներում խաղաղ ցույցերը ցրելու և երաժիշտներին լռեցնելու համար», – շեշտել է «Amnesty International»-ի փոխտնօրեն Ջոն Դալհուզենը:
Արմեն Հովհաննիսյան
«Ամերիկայի Ձայն»
