Օրերս ՀՀ նախկին նախագահ Ռոբերտ Քոչարյանի մամուլի խոսնակ Վիկտոր Սողոմոնյանը հաստատել էր տեղեկությունը, թե Քոչարյանն ու ՌԴ նորընտիր նախագահ Վլադիմիր Պուտինը դեմ առ դեմ հանդիպել են, եւ ըստ լրատվամիջոցներում տարածված տեղեկության, որը Սողոմոնյանը հերքել էր՝ նրանք քննարկել են Հայաստանի նախընտրական իրավիճակը, չի համապատասխանում իրականությանը:
Aravot.am-ն այսօր ՀՀԿ փոխնախագահ Գալուստ Սահակյանին հարցրեց՝ ՀՀԿ-ն անհանգստացած չէ՞ հայաստանյան ընտրություններից առաջ տեղի ունեցած այդ հանդիպման փաստից. «Ընդհանրապես ես միշտ հանդիպումներում դրական բան եմ տեսնում ու չեմ կարծում, որ որեւէ հայ կա աշխարհում, որը որեւէ տեղ հանդիպի ու դա պետության համար վտանգ դառնա»: Մեր պնդմանը՝ պետությանը չի վտանգի, իսկ ՀՀԿ-ի՞ն, Սահակյանն արձագանքեց. «Չեմ կարծում, որ դրանից ՀՀԿ-ին վտանգ կսպառնա: ՀՀԿ-ին մի կողմ դնենք: Վտանգները բոլորի համար են, մեր խնդիրը միայն պետությունն է եւ նրա արժեհամակարգը: Մենք այդ ճանապարհով ենք շարժվում»:
Նաիրա ՄԱՄԻԿՈՆՅԱՆ
