Երեւանի մամուլի ակումբն այսօր «Ուրբաթ» ակումբում ներկայացրեց մարտի 1-10-ն ընկած ժամանակահատվածում 9 լրատվամիջոցներում անցկացրած մոնիտորինգի արդյունքները: Ակումբը դրական տեղաշարժեր է նկատել նոյեմբեր-դեկտեմբեր ամիսների արդյունքների համեմատ:
Երեւանի մամուլի ակումբի նախագահ Բորիս Նավասարդյանի խոսքերով, 10 օրվա ուսումնասիրության ադյունքում արձանագրել են գնահատականներ պարունակող անդրադարձերի նվազում: Եթե նոյեմբեր-դեկտեմբեր ամիսներին գնահատական պարունակող անդրադարձերը մոտ 10 տոկոս էին կազմում, մարտի տվյալներով՝ հասել են մոտ 7 տոկոսի:
Նրա խոսքերով, առավել ակտիվ է մնում «Կենտրոն» հեռուստաալիքը, որն ամենից շատ է անդրադարձել կուսակցություններին, իսկ ավելի քիչ է անդրադարձել «Շանթը»:
Բ. Նավասարդյանն ասաց, որ կուսակցությունների ամենահամաչափ լուսաբանումը Հանրային ռադիոյում է ու Հ2-ում:
Կարդացեք նաև
Առավել շատ են կուսակցություններին լուսաբանել «Երկիր Մեդիա»-ն, որտեղ մյուս կուսակցությունների համեմատ առավելություն ուներ Դաշնակցությունը եւ «Կենտրոնը», որտեղ առավել դիրքերում է ԲՀԿ-ն:
Գնահատականներ պարունակող անդրադարձերով «Շանթից» հետո քիչ գնահատականներ ներկայացնող լուսաբանումներից «Երկիր Մեդիա»-ն է, Հ2-ը եւ Հանրային ռադիոն:
Գնահատականների նվազումը հեռուստաալիքներում պարոն Նավասարդյանը պայմանավորում է թաքնված գովազդի ծավալների կրճատմամբ. «Այս 10 օրվա ընթացքում չենք տեսել թաքնված գովազդներ, դրական տեղաշարժ է, որովհետեւ նոյեմբեր–դեկտեմբերին այդ կարգի նյութերը շատ էին»:
Արփինե ՍԻՄՈՆՅԱՆ
