Արգենտինացի գերաստղը շարունակում է արժանանալ կոչումների ու տիտղոսների եւ «ամենա» մակդիրը նրան հետապնդում է կրնկակոխ:
«France Football»-ի հաշվարկներով Մեսսին տարեկան 33 մլն. եվրո ընդհանուր վաստակով ամենահարուստ ֆուտբոլիստն է աշխարհում: «Բարսելոնում» նրա աշխատավարձը 10,5 միլիոն եվրո է, 1,5 միլոն էլ նա ստանում է որպես պարգեւավճար: Սակայն ֆուտբոլիստի եկամտի հիմնական աղբյուրը գովազդային պայմանագրերն են, որոնցով նա վաստակում է լրացուցիչ 21 միլիոն եվրո: Սուպերհարձակվողը «Adidas»-ի դեմքն է, համագործակցում է «Herbalife»-ի հետ, հաճույքով «Pepsi Cola» է ըմպում եւ օգտվում է «Gillette»-ից:
Վաստակած գումարի չափով համաշխարհային ֆուտբոլում «արծաթե մեդալակիրը» Դեւիդ Բեքհեմն է՝ տարեկան 31,5 եվրոյով, իսկ եռյակը եզրափակում է Կրիշտիանու Ռոնալդուն (29,2 մլն. եվրո):
Աշոտ ՀԱԿՈԲՅԱՆ
