Շուրջ 5 օր է, ինչ Տավուշի մարզի Կողբ գյուղի 37-ամյա բնակիչ, «Կողբ» տաքսի ծառայության վարորդ Արմեն Բարսեղյանը Վրաստանում ձերբակալված է: Նրա գործընկերները հայտնեցին, որ Արմենի հեռախոսն անջատված է, եւ նրա գտնվելու վայրի մասին տեղեկություն չկա:
Դեբեդի հովտում հայ-վրացական սահմանը հսկող զինվորներից մեկը տաքսիստին որպես փոխադրավարձ 2 հազար դրամ պարտք է եղել: Արմենը Բագրատաշենի մաքսակետ տանող միջպետական մայրուղու եզրին, Դեբեդի ամբարտակ ծառայող կամրջի վրա զինվորներ է տեսել: Փաստորեն կամուրջը հայ-վրացական սահման է հանդիսանում, սակայն սահմանի մասին նախազգուշական ցուցանակ չկա: Արմենը զինվորներ տեսնելով` կարծել է, որ իրեն գումար պարտք սահմանապահ հայ զինվորը կարող է նրանց մեջ լինել: Նա կամրջով քայլելով` հայտնվել է վրացական տարածքում, վրաց սահմանապահների մոտ: Սահմանապահներն Արմենի մոտ, բացի իր անձնագրից, գտել են նաեւ Ալավերդու մի բնակչի անձնագիր: Վերջինս փոխադրավարձը չկարողանալով վճարել` իր անձնագիրը տաքսիստին գրավ է թողել: Վրաց սահմանապահներն այդ պատճառով կողբեցուն հետախույզի տեղ են դրել:
Իրազեկ աղբյուրներն ասում են, որ Արմենի նկատմամբ Վրաստանում արագացված դատաքննություն է սկսվել, նրան մեծ տուգանք է սպասվում: Հայաստանի անկախանալուց 21 տարի անց բարեկամ երկիր Վրաստանի հետ դեռ սահմանազատում չի արված, սահմանագծի նշումները շատ տեղերում բացակայում են: Այս վիճակի մասին «Առավոտը» նախկինում գրել է:
Ոսկան ՍԱՐԳՍՅԱՆ
Կարդացեք նաև
