«Այո´, ՀՀԿ-ն հանդես է գալիս ՀՀԿ-ին վայել համամասնական ցուցակով»,- ԱԺ պատգամավոր, ՀՀԿ անդամ Արտակ Զաքարյանն այսպես պատասխանեց Aravot.am-ի այն հարցին՝ արդյոք ՀՀԿ-ին վայե՞լ է այն ցուցակը, որտեղ 10-րդ տեղում է Երևանի նախկին քաղաքապետ Գագիկ Բեգլարյանը, որը 2010-ի դեկտեմբերին տեղի ունեցած միջադեպի պատճառով ժամանակավորապես հեռացվեց քաղաքականությունից, կամ գեներալ Մանվելի ներկայությունը, որի գործունեությունը բոլորին է հայտնի: Մանրամասնելով՝ քաղաքական գործիչը նաև նշեց. «Որպես զանգվածային ուժ՝ 250 անձից բաղկացած ցուցակում մենք փորձել ենք ներկայացնել և ներգրավել հասարակության բոլոր շերտերի, խմբերի զանգվածային ներկայացվածությունը, և ինչ-որ իմաստով այս գործիչներից յուրաքանչյուրը, ինչպես նաև ես, իր տեղում անփոխարինելի է»:
Մեր մյուս հարցին՝ ինչո՞ւ դեռ քարոզարշավը չսկսած ՀՀԿ-ն արդեն քարոզարշավ է սկսել եւ Հանրապետականի լոգոյով ավտոբուսով շրջում է հանրապետությունով մեկ, կամ համայնքներում ժամանակից շուտ նախընտրական շտաբներ են բացվել, ՀՀԿ-ական պատգամավորը պատասխանեց. «ՀՀԿ-ն ոչ մի բանից առաջ չի ընկել: Ամեն ինչ ժամանակացույցի մեջ է: Ավտոբուսը քարոզչություն չէ, այն ընդամենը տրանսպորտի միջոց է: Կարող էր և լոգոյով չլինել, ես բան չեմ ասում: Ես էլ կարող եմ իմ մեքենայի վրա ՀՀԿ-ի զինանշանը, կամ լոգոն փակցնել, դա կլինի քարոզչությո՞ւն»:
Aravot.am-ը պարոն Զաքարյանից նաև հետաքրքրվեց՝ հնարավո՞ր է ՀՀԿ-ԲՀԿ կոալիցիոն գործընկերությունը մայիսի 6-ի խորհրդարանական ընտրություններից հետո խզվի ԲՀԿ-ի ներկայիս վարքի պատճառով, քանի որ արդեն մեծամասնական համակարգով իրար դեմ են առաջադրվել ՀՀԿ և ԲՀԿ ներկայացուցիչներ: ԱԺ պատգամավորը պատասխանեց. «Սա նորմալ մրցակցային գործընթաց է, որտեղ հասարակությունը պիտի հնարավորություն ունենա ընտրել լավագույնին: Կարծում եմ, որ համագործակցությունը միշտ էլ ցանկալի և նախընտրելի է բոլորի համար, այդ թվում նաև ԲՀԿ-ի»:
Կարդացեք նաև
Տաթև ՀԱՐՈՒԹՅՈՒՆՅԱՆ
