Հայ Ազգային Կոնգրեսի նախընտրական գործունեության մասին
ՀԱԿ-ը շարունակում է մնալ քաղաքական այն իրական ուժը, որը կարող է հակազդել երկրում գործող ապօրինի իշխանություններին: Անկասկած, դա Առաջին Նախագահի քրտնաջան և նվիրյալ գործունեության արդյունքն է 2007թ.-ից առ այսօր, ինչը պարտավոր ենք պահպանել նրա շուրջ համախմբված, առավել ևս, «Շարժման կորիզը կազմող», յուրաքանչյուրս:
Դա է պատճառը, որ մենք պատասխանատվությամբ և մտահոգությամբ ենք ընդունում ցանկացած վրիպում, որը մեր կարծիքով, կարող է վնասել Կոնգրեսի հեղինակությանը և հռչակագրային գործունեությանը, հատկապես, այնպիսի շրջադարձային պահերին, ինչպիսին համապետական ընտրություններն են:
Այսպես, այն, որ կիսատ թողեցինք պայքարն ընդդեմ իշխանությունների ապօրինի կարգավիճակի, դա փաստ է, այն էլ՝ ցավալի, ինչն ավելի սանձարձակեց իշխանության յուրացողներին և էական ազդեցություն է թողնում ընտրական գործընթացների վրա:
Կարդացեք նաև
Այն որ, շարունակում ենք բացարձակ անուշադրության մատնել այնպիսի գործոնների, որոնք կարող են էական ազդեցություն ունենալ ընտրությունների արդյունքների վրա, դա էլ է փաստ, նույնքան ցավալի, մասնավորապես՝
- ՀՀԿ-ական ապօրինի ԸՕ-ի գործածությունը,
- ՀՀԿ կողմից իշխանության յուրացումը,
- կուսակցությունների բարեգործությունը,
- ապօրինի գրանցված կուսակցությունների ընտրագործունեությունը,
- որոշ եվրոկառույցների լկտի աջակցությունը ՀՀԿ ապօրինություններին:
Այս պայմաններում, աստղային ցուցակն էլ չի օգնի ՀԱԿ-ին, անգամ, պառլամենտական սահմանված շեմը հաղթահարելու համար, սակայն, նախընտրական ցուցակի որակն, այնուամենայնիվ, մտահոգում է մեզ և հույս ենք հայտնում, որ այդ մասին հրապարակային ներկայացումն առավել լսելի կլինի ՀԱԿ-ի առաջնորդին, մասնավորապես՝
- Առաջին Նախագահը չպետք է առաջադրվի, որպես ԱԺ պատգամավորության թեկնածու,
- 1995-2008թ.թ.-ի կեղծված ընտրությունների արդյունքներով ձևավորված իշխանություններում քաղաքական և հայեցողական պաշտոններ զբաղեցնող անձիք չպետք է տեղ զբաղեցնեն Ցուցակի 1-30 տեղերում,
- Նույնը վերաբերում է, նաև, 1992-1997թ.թ.-ի ՀՀՇԿ-ական ականավոր գործիչներին,
- 1995-2008թ.թ.-ի կեղծված ընտրությունների ԿԸՀ-ների որևէ անդամ չի կարող տեղ զբաղեցնել Ցուցակում՝ ընդհանրապես,
- ՀԱԿ-ի Ցուցակի «առաջին տիկինը» պետք է հեղինակություն վայելի Հայաստանի կանանց շրջանում:
Հայտարարում ենք, որ ՀԱԿ առաջնորդն, ի հիշատակ 1995 և 1996թ.թ.-ի, պետք է հնարավորինս ձեռնպահ մնա զգացմունքային դրսևորումներից՝ սա այդ պահը չէ…
…իսկ մեր մտահոգությունը, հոգուտ Կոնգրեսի է և հայաստանցու:
«ՄԻ-96» կուսակցության վարչություն
