HUMAN RIGHTS DEFENSE իրավապաշտպան կազմակերպության Խաչատուր Սուքիասյանի վերբերյալ ՀՀ Ոստիկանության կողմից կայացված ապօրինի որոշման մասին
HRD Իրավապաշտպան կազմակերպությունը փորձագիտական ուսումնասիրության ենթարկելով ՀՀ Ոստիկանության անձնագրային և վիզաների վարչության 15.05.2012 թվակիր գրությունը` Խաչատուր Սուքիասյանին Էրեբունու անձնագրային բաժանմունքի կողմից 03.03.2012թ. տրամադրված տեղեկանքը չեղյալ հայտարարելու վերաբերյալ և Խաչատուր Սուքիասյանի ՀՀ Կենտրոնական Ընտրական և ընտրատարածքային հանձնաժողովներին ներկայացված դիմումները` ՀՀ Ազգային Ժողովի պատգամավորության թեկնածու իրեն գրանցելու վերաբերյալ, հանգել է այն եզրակացության, որ պետական կառավարման վերոնշված մարմնի կողմից կայացվել է ակնհայտ ապօրինի և անհիմն որոշում: Արդյունքում խախտվել են ՀՀ Քաղաքացի Խաչատուր Սուքիասյանի ընտրվելու և ՀՀ քաղաքացիների ընտրելու իրավունքները, ավելին նմանատիպ անօրինական գործողություններով կասկածի տակ է դրվել գալիք խորհրդարանական ընտրությունների օրինականությունը:
HRD Իրավապաշտպան կազմակերպությունը դիմում է Հայաստանի Հանրապետության գլխավոր դատախազությանը ՀՀ Ոստիկանության անձնագրային և վիզաների վարչության ապօրինի և անհիմն որոշումը չեղյալ հայտարարելու և մեղավոր անձանց պատասխանատվության կանչելու խնդրանքով:
HRD Իրավապաշտպան կազմակերպությունը կոչ է անում հայաստանյան քաղաքական իշխանություններին ձեռնպահ մնալու մրցապայքարին մասնակցող անհատների և քաղաքական միավորների նկատմամբ կիրառվող անօրինական սահմանափակումներից և քաղաքական հետապնդումներից:
Կարդացեք նաև
HUMAN RIGHTS DEFENSE Իրավապաշտպան կազմակերպություն
Լոս Անջելես, Քալիֆորնիա, ԱՄՆ, 17 Մարտի 2012թ
Հ.Գ. Սույն իրավապաշտպան կազմակերպությունը “Հայ Քաղաքացիական Հասարակություն” Մարդու իրավունքների պաշտպանության ընկերակցությունն է, որը վերանվանվելուց հետո կրում է HUMAN RIGHTS DEFENSE անվանումը: Իրավապաշտպան կազմակերպությունը հետևելու է խորհրդարանական ընտրությունների օրինականության ընթացքին և իրեն հասու միջոցներով պայքարելու է Հայաստանում ժողովրդավարական կարգի վերականգնման և օրինական ընտրությունների անցկացման համար:
