Պոլսի Հայոց պատրիարքությունը դատարան է դիմել՝ պահանջելով վերադարձնել Թուրքիայում գտնվող «Սանասարյան» հիմնադրամի գույքը՝ հետևելով Թուրքիայի հիմնադրամների տնօրինությունից Սանասարյանների առևտրի կենտրոնը վերադարձնելու պահանջով ներկայացված դատական հայցին:
Այս մասին հաղորդել է «Հուրիեթ» պարբերականը՝ մեջբերելով Հայոց պատրիարքության շահերը դատարանում ներկայացնող փաստաբան Ալի Էլբեյօղլու խոսքը:
««Սանասարյան» հիմնադրամը 1800-ական թվականներին պատրիարքությանն է նվիրաբերվել բարեգործ Մկրտիչ Սանասարյանի կողմից: «Սանասարյան» հիմնադրամի վարչարարության ու կառավարման օրինական իրավունքները պատկանում են պատրիարքությանը», – ասել է փաստաբանը՝ հավելելով. «Մենք չենք սահմանափակվելու միայն պատմական նշանակություն ունեցող շինությունները վերադարձնելու պահանջով: Պատրաստվում ենք նաև Հիմնադրամների տնօրինությունից փոխհատուցում պահանջել պատրիարքությանը 1936 թվականից հասցված ամբողջ վնասի համար»:
Թուրքիայի կառավարության պահանջով երկրում բնակվող փոքրամասնությունները 1936 թվականին ներկայացրել են իրենց պատկանող անշարժ գույքը մանրամասն նկարագրող փաստաթղթեր: Տարիների ընթացքում սակայն այս գույքը վաճառվել է երրորդ կողմերին:
Կարդացեք նաև
Հայոց պատրիարքության շահերը դատարանում ներկայացնող փաստաբան Էլբեյօղլուի համաձայն, Թուրքիայի հիմնադրամների տնօրինությունը բռնագրավել է «Սանասարյան» հիմնադրամը՝ հիմք ընդունելով 1936 թվականին ներկայացված հայտարարագիրը:
