«Մենք գնում ենք ընտրությունների, որպեսզի ժամ առաջ պրծնենք այս իշխանություններից»,-այսօր «Հայելի» ակումբում հայտարարեց ՀԱԿ ներկայացուցիչ Գորգեն Եղիազարյանը: Նա ներկայացրեց նախորդ ընտրություններից առաջ իշխող կուսակցության ծրագրերից մի քանի կետեր՝ մասնավորապես այն, որ երիտասարդ ընտանիքը կարող է ձեռք բերել բնակարան և մեքենա: Ի հակադրություն ՀՀԿ խոստումների՝ պարոն Եղիազարյանը նշեց. «Կղզիներ գնելու հնարավորւթյուն միայն մեր երկրի բնակչության երկու տոկոսն ունի, իսկ 98 տոկո՞սը: Չէ՞ որ դուք խոստացել էիք բնակարան և մեքենա»: Ի պատասխան քննադատության՝ ՀՀԿ անդամ, ԱԺ պատգամավոր Կարինե Աճեմյանը պատասխանեց. «Եթե բոլոր ծրագրերն իրականացրած լինեինք, ապա կլիներ իդեալական երկիր: Բայց մեր խոստացած ծրագրերը 98 տոկոսով իրականացրել ենք»:
Անդրադառնալով ՀՀԿ-ի քաղաքական ծրագրին՝ Գ. Եղիազարյանն այն համեմատեց «բուբլիկի միջի անցքի» հետ: Ավելին, ըստ նրա՝ այդ ծրագրում կա մի կետ, որը միջազգային իրավունքի խախտում է: Այդ կետով ամրագրված է, որ ցանկացած հայ ընտանիքի համար կրթությունն ու գիտելիքը կլինեն ամենամեծ պահանջարկ ունեցող ռեսուրսները: Հենց այս պատճառով էլ Գ. Եղիազարյանը պահանջում է ՀՀԿ-ից, որպեսզի ներողություն խնդրի ՀՀ-ում բնակվող ազգային փոքրամասնութուններից:
Պատասխանելով բոլոր քննադատություններին՝ Կ. Աճեմյանը ինքնավստահ կերպով հայտարարեց, թե իրենք այնքան լավ են աշխատում, որ դրա համար էլ նորից գնում են իշխանության:
Կարդացեք նաև
Դառնալով ընտրական ներկայիս գործընթացներին՝ պարոն Եղիազարյանը վստահեցրեց, որ ապրիլին անակնկալ զարգացումներ են սպասվում:
Ասուլիսի ավարտից հետո Գուրգեն Եղիազարյանը Կարինե Աճեմյանին նվիրեց իր հեղինակած վեպը` նվիրված Շահան Նաթալիին, որպեսզի որոշ ՀՀԿ գործիչներ, որոնք ընդհանրապես Նժդեհ չեն կարդացել, իրական պատկերացում կազմեն նժդեհիզմի մասին:
Տաթև ՀԱՐՈՒԹՅՈՒՆՅԱՆ
