Այսօր քնի համաշխարհային օրն է (World Sleep Day). հաղորդում է plitkar.com-ը:
Մարտի 16-ը, որպես քնի համաշխարհային օր, օրացույցում հայտնվել է Քնի բժշկության համաշխարհային ասոցիացիայի նախաձեռնությամբ եւ Philips ընկերության օժանդակությամբ:
Ամեն տարի այս օրը, աշխարհի մի շարք երկրներում, որտեղ նշվում է քնի համաշխարհային օրը, անցկացվում են կոնֆերանսներ, սեմինարներ` նվիրված քնի խնդիրներին եւ դրա խախտումների ազդեցությանը մարդու վրա:
Մասնագետների հաղորդմամբ՝ միջին հաշվով, յուրաքանչյուր մարդ քնած է անցկացնում իր կյանքի երրորդ մասը: Գիտնականները ապացուցել են, որ անքնությունը բացասաբար է ազդում մարդու կյանքի որակի վրա: Մշտապես անքուն մարդիկ նյարդային են, ինքնամփոփ , իսկ քնի կորստի հետեւանքով վատանում է հիշողությունը, հնարավոր է՝ նաեւ տարբեր հիվանդությունների սրում լինի:
Կարդացեք նաև
Գիտնականները նշում են, որ նորմալ քնելու համար պետք է հետեւել վերոնշյալ սկզբունքներին` շարունակական անքնությամբ չզբաղվել, քնից առաջ ալկոհոլային խմիչք չօգտագործել, ճաշել քնից չորս ժամ առաջ: Պարզվում է՝ շատ քնելը նույնպես բացասական ազդեցություն կարող է ունենալ, ինչպես անքնությունը:
Ըստ մասնագետների՝ հասուն մարդը պետք է օրվա մեջ 6-ից 8 ժամ քնի: Կանանց խորհուրդ է տրվում մեկ ժամ ավելացնել այդ նորմային, քանի որ նրանք ավելի զգացմունքային են, հետեւաբար՝ հանգստին պետք է ավելի շատ ժամանակ հատկացնեն:
Երեխաները պետք է քնեն օրական 10 ժամից ոչ քիչ:
