Արմավիրի թիվ 1 հատուկ դպրոցում սովորում է 90 աշակերտ՝ ֆիզիկական խնդիրներով եւ մտավոր թույլ ունակություններով: Երեխաներն այս դպրոց են ընդունվում Երեւանի բժշկահոգեբանամանկավարժական կենտրոնի հետազոտություններից հետո: Ուսուցումն իրականացվում է ըստ անհատական ուսումնական պլանի: «Ինչ խոսք, բարդ է նման երեխաների հետ, բայց սա մեր աշխատանքն է, մենք սիրում ենք երեխաներին ու ամեն ինչ անում, որ նրանք ունենան տարրական գիտելիքներ»,- մեզ հետ զրույցում ասաց ուսուցիչներից մեկը: Դպրոցն ունի հատուկ առանձնացված խաղասենյակներ, մարզադահլիճ, ննջասենյակներ, արհեստագործական սենյակ: Կա նաեւ կավագործության արհեստանոց, որը վերջերս է սկսել գործել տնօրեն Լիլիա Ասատրյանի նախաձեռնությամբ:
Դպրոցի ուսումնադաստիարակչական գծով փոխտնօրեն Նախշուն Գարեգինյանի խոսքերով՝ դպրոցը 1982 թվականից գրականություն չի ստացել, եւ իրենք ստիպված են ուսումնական գործընթացն իրականացնել հին գրքերի կամ իրենց իսկ կողմից մշակված նյութերի միջոցով: Դպրոցում մտահոգված են շրջանավարտների հետագա ուղիով. ոմանք հետո կրթությունը շարունակում են Երեւանի թիվ 2 մասնագիտական կողմնորոշում ունեցող դպրոցում, շատերն էլ հայտնվում են դրսում՝ երբեմն նույնիսկ տառաճանաչ չլինելով:
ԱՆԻ ՄԿՐՏՉՅԱՆ
«Առավոտ» օրաթերթ
