Շաբաթ օրը կայանալիք «Բարգավաճ Հայաստան» կուսակցության վեցերորդ արտահերթ համագումարում ԲՀԿ-ի համամասնական ցուցակը չի հրապարակվի: Այդ մասին Aravot.am-ի հետ զրույցում ասաց ԲՀԿ քաղխորհրդի անդամ Նաիրա Զոհրաբյանը. «Եկող շաբաթվա առաջին օրերին կհրավիրվի կուսակցության քաղխորհրդի նիստը, որը կհաստատի ԲՀԿ-ի համամասնական ցուցակը եւ, այնուհետ, սահմանված կարգով ցուցակը կներկայացվի ԿԸՀ»:
Ինչ վերաբերվում է մեծամասնական կարգով առաջադրումներին, տիկին Զոհրաբյանն ասաց, որ այսօր եւ վաղն այդ քննարկումները եվս կշարունակվեն. «Ես կարծում եմ, որ եկող շաբաթվա առաջին օրերին մենք կունենանք վերջնական պատկեր՝ թե մեծամասնական ընտրակարգով ԲՀԿ-ից քանի մարդ է առաջադրվելու»:
Մեր զրուցակիցը «կատարյալ անհեթեթություն» անվանեց մամուլում շրջանառվող լուրերը, որ ԲՀԿ-ն եւ ՀՀԿ-ն պայմանավորվածություն ունեն յոթ ընտրատարածքներում մեծամասնական կարգով առաջադրումների վերաբերյալ. «Մենք մեծամասնական ընտրակարգով կառաջադրենք այնքան թեկնածու, ինչքան որ նպատակահարմար կգտնենք: Միանշանակ, առաջադրվողների թիվը շատ ավելի է լինելու, քան, այսպես ասած, յոթ տեղերի մասին ինչ-որ տեղից պեղված անհեթեթ տեղեկատվությունը, որն անընդհատ շրջանառվում է մամուլում»: Տիկին Զոհրաբյանն ասաց, որ ԲՀԿ-ի եւ ՀՀԿ-ի միջեւ ընդհանրապես որեւէ պայմանավորվածություն չկա մեծամասնական կարգով միմյանց դեմ թեկնածուներ չառաջադրելու վերաբերյալ. «Կլինեն առաջադրումները եւ կտեսնեք, որ մամուլում համառորեն շրջանառվող այդ տեղեկատվությունը եվս չի համապատասխանում իրականությանը»:
Նելլի Գրիգորյան
Կարդացեք նաև
