Երևանի քաղաքապետ Տարոն Մարգարյանի հրավիրած հերթական աշխատանքային խորհրդակցության ընթացքում ամփոփվել են մայրաքաղաքի վարչական շրջանների փետրվար ամսին ըստ ոլորտների կատարած աշխատանքների գնահատման և վերլուծության արդյունքները: Գործառույթների իրականացման բոլոր ոլորտների ցուցանիշների հանրագումարով վարկանիշային առաջին 3 տեղերը, ըստ հերթականության, զբաղեցրել են Ավան, Դավթաշեն և Էրեբունի վարչական շրջանները: Գնահատման վարկանիշային աղյուսակում ցածր ցուցանիշներ են արձանագրել Աջափնյակ, Կենտրոն և Նուբարաշեն վարչական շրջանները: Քաղաքապետարանի աշխատակազմի քարտուղարի ժամանակավոր պաշտոնակատար Սերգեյ Մակարյանը տեղեկացրել է, որ վարչական շրջաններում սեփական եկամուտների հավաքագրման, ինչպես նաև սպորտի և մշակութային միջոցառումների անցկացման մասով գնահատման նոր մոտեցումներ են կիրառվել, որոնք ավելի արդյունավետ կդարձնեն գործընթացը: Ըստ այդմ, հատկապես սպորտային և մշակութային միջոցառումների անցկացման հետ կապված վեց վարչական շրջաններում արձանագրվել են թերացումներ: Քաղաքապետ Տարոն Մարգարյանը համապատասխան վարչական շրջանների ղեկավարներին հանձնարարել է տեղերում ուսումնասիրել թերացումների պատճառներն ու քայլեր ձեռնարկել դրանք շտկելու ուղղությամբ: Զեկուցվել է նաև, որ առավելագույն ցուցանիշներ վարչական շրջանները փետրվար ամսին ապահովել են դիմում-բողոքների արձանագրման ու փաստաթղթաշրջանառության իրականացման ոլորտներում:
Սեփական եկամուտների հավաքագրման հետ կապված որոշակի թերացումներ արձանագրած չորս վարչական շրջանների ղեկավարներին էլ քաղաքապետը հանձնարարել է սեղմ ժամկետում ճշգրտել բազաներն ու ամենօրյա հսկողության տակ պահել կատարվող աշխատանքների ընթացքը: Միաժամանակ, Տարոն Մարգարյանն ընդգծել է, որ պատկերը առավել հստակ դարձնելու համար, այսուհետ աղբահանության հավաքագրման ցուցանիշը կառանձնացվի սեփական եկամուտների հավաքագրման ցուցանիշից: Քաղաքապետը հանձնարարել է նաև ավելի հետևողական լինել ապօրինի շինարարության և հողօգտագործման դեպքերը կանխելու, բարեկարգման և կանաչապատման, աղբահանության և սան.մաքրման աշխատանքները ավելի բարեխիղճ կազմակերպելու հարցերում:
Անդրադառնալով վարչական շրջանների կատարած աշխատանքների ամենամսյա գնահատման և վերլուծության սկզբունքին, քաղաքապետը մեկ անգամ ևս շեշտել է, որ այս մոտեցման հիմնական նպատակը տեղերում աշխատանքների արդյունավետության հետևողական բարձրացումն ու թերացումների շտկումն է: Ըստ այդմ, Տարոն Մարգարյանը հանձնարարել է տեղերում վերլուծել գրանցված արդյունքներն ու հստակ քայլեր ձեռնարկել թերացումները շտկելու ուղղությամբ:
Կարդացեք նաև
Երևանի քաղաքապետարանի տեղեկատվության
և հասարակայնության հետ կապերի վարչություն
