Տարիներ շարունակ հայ բեմից հնչել է տաղանդավոր հայ դերասանների խոսքը, ականատես եւ ունկնդիր ենք եղել հիասքանչ դերակատարումների: Վերջին տարիներին շատ է խոսվում մայրենիի, մաքուր գրական լեզվի խաթարման ու ժարգոնի մասին: Հատկապես ավագ եւ միջին սերնդի ներկայացուցիչներս ոչ վաղ անցյալում հայ բեմի տաղանդաշատ վարպետներից լսելով ոսկեղենիկ հայերենը՝ այսօր դժվարանում ենք համակերպվել առկա վիճակի հետ:
Ո՞վ չի հիացել Փափազյանի, Ներսիսյանի, Ավետիսյանի, Ջանիբեկյանի, Աբրահամյանի ոչ միայն բարձրարվեստ խաղով, այլեւ մաքուր հայերենով, խոսքի հատուկ առոգանությամբ: Ուրախությամբ ուզում եմ փաստել, որ այսօր էլ ոգեւորվում եմ «Գեներալի աղջիկը» սերիալի գլխավոր դերակատարներ Արմեն եւ Աննա Էլբակյանների հիասքանչ խաղով, խոսքի վարպետությամբ, բարձր պրոֆեսիոնալիզմով ու գեղեցիկ հայերենով: Այդ շնորհաշատ դերասանները մեզ վերադարձրին վաղուց մոռացված մեր տաղանդավոր դերասանների շունչը:
ՍՈՒՍԱՆՆԱ ԳԵՎՈՐԳՅԱՆ
դաշնակահար, դոցենտ
