Օրերս կայացավ երգիչ Հայկ Կասպարովի «Սիրո տողեր» տեսահոլովակի պրեմիերան: Երգիչը հաճելիորեն զարմացրեց հեռուստադիտողին՝ ներկայանալով նոր ոճով եւ նոր տեսահոլովակով: Երգը, որի հիման վրա նկարահանվել է տեսահոլովակ, բալլադային ոճի է:
Aravot.am-ի հետ զրույցում Հայկ Կասպարովը հայտնեց, որ իր երգի հեղինակը Մարինե Պետրոսյանն է, տեսահոլովակի ռեժիսորը՝ Գեորգի Հարությունյանը, իսկ օպերատորը՝ Կարեն Ստեփանյանը:
Նրա փոխանցմամբ՝ տեսահոլովակի նկարահանումները կատարվել են Դավիթաշենում գտնվող առանձնատներից մեկում, եւ տեւել է ընդամենը մեկ օր:
«Տեսահոլովակը «փշոտ» սիրո մասին է՝ սեր, տառապանք, խաբկանք: Երգն էլ լայնաշունչ ռոք-բալլադ է, էմոցիաների պոռթկում: Ես առաջին անգամ եմ նման ոճի երգ կատարում, ինձ համար սա նորություն էր: Նշեմ, որ շատերն են զարմացել, որ ես կարողացել եմ նման ոճում հանդես գալ: Երգի տեքստում կան շատ զգացմունքային տողեր, որոնք իրենց հետքն են թողել ձայնագրման ժամանակ…», – նշեց Հայկը՝ հավելելով, որ արդեն որոշել է ընտրել ոչ թե հիթային ու պրիմիտիվ երգեր, այլ այնպիսիք, որոնք ցույց կտան իր վոկալ հնարավորությունները:
Կարդացեք նաև
Երգիչը համոզված է, որ ինչպես իր մյուս երգերի դեպքում է, այնպես էլ այս մեկը կդառնա սիրված ու հիթային. նա նաեւ կարծում է, որ «Սիրո տողերը» հաջողված տեսահոլովակ է, բայց գնահատականներ տալը թողնում է հեռուստադիտողին:
Նշենք, որ «Սիրո տողերում» Հայկը շատ կարճ սանրվածքով է, նոր կերպարի մեջ:
Եվա ՀԱԿՈԲՅԱՆ
