Այսօր Տնտեսական մրցակցության պաշտպանության պետական հանձնաժողովը (ՏՄՊՊՀ) հրապարակեց «Սիթի Պետրոլ Գրուպ» ընկերության (CPS) հանդեպ հարուցած վարչական վարույթի արդյունքները: Հանձնաժողովն այս ընկերությանը տուգանեց 100 միլիոն դրամով:
Բենզինի եւ դիզելային վառելիքի ներկրմամբ ու իրացմամբ զբաղվող «Սիթի Պետրոլ Գրուպ» ընկերությունը, որը հանդիսանում Է գերիշխող եւ զբաղեցնում է բենզինի շուկայի 41,76 %-ն ու դիզելային վառելիքի շուկայի 40,8 %-ը, ըստ հանձնաժողովի՝ գերիշխող դիրքը չարաշահել է: Հանձնաժողովը ուսումնասիրություն էր կատարել հանրապետության ողջ տարածքում, ինչի արդյունքում պարզվել էր, որ «Սիթի Պետրոլ Գրուպ»-ը հատկապես ՀՀ մարզերում փորձել է ոչնչացնել փոքր բիզնեսով զբաղվող բենզալցակայանները: Մասնավորապես՝ CPS-ը, լինելով խոշոր մատակարար, փոքր բենզալցակայաններին բենզինը վաճառել է ճիշտ այնքան գնով, որքան որ վաճառում է իրեն պատկանող բենզալցակայաններում: Արդյունքում՝ փոքր բիզնեսի ներկայացուցիչները չեն կարողացել դիմանալ մրցակցությանը եւ մեկը մյուսի հետեւից սկսել են իրենց բենզալցակայանները վաճառել «Սիթի Պետրոլ Գրուպ»-ին: Այսինքն՝ ստացվում է, որ խոշոր ընկերությունը միտումնավոր սնանկացրել է փոքր բիզնեսի ներկայացուցիչներին:
Չնայած հանձնաժողովի պատասխանատուները հայտնեցին, որ ընկերության ներկայացուցիչները պատշաճ ծանուցված են եղել, սակայն «Սիթի Պետրոլ Գրուպ»-ից որեւէ ներկայացուցիչ նիստին ներկա չէր: «Սիթի Պետրոլ Գրուպ»-ի տնօրենն է Աշոտ Սալազարյանը:
Լուսինե ԲՈՒԴԱՂՅԱՆ
