Մասնավոր խուզարկուն բողոքում է
Կենտրոն եւ Նորք-Մարաշ վարչական շրջանների ընդհանուր իրավասության դատարանը հունվարի 13-ին մեկ ամսվա ազատազրկման դատապարտեց Վլադիմիր Թուրաբյանին:
Վլադիմիր Թուրաբյանը բողոքով դիմել է ՀՀ քրեական գործերով վերաքննիչ դատարան: Բողոքի քննությունը դեռ չի սկսվել:
Կարդացեք նաև
Վլադիմիր Թուրաբյանը նախկինում աշխատել է Հայաստանի ազգային անվտանգության ծառայությունում: Թողնելով ծառայությունը՝ նա զբաղվել է մասնավոր խուզարկուական գործունեությամբ, որը կարգավորող օրենք Հայաստանում չկա, հետեւաբար, ըստ նրա տրամաբանության, իր գործունեությունը չի կարող անօրինական համարվել:
Սակայն, արի ու տես, դիտվել է: Ավելին, նա դատապարտվել էր ազատազրկման: Ի դեպ, հասցրել է լինել արդարադատության նախարարության «Վարդաշեն» քրեակատարողական հիմնարկում՝ Գագիկ Ջհանգիրյանի խցընկերը:
Ազատվելուց հետո էլ նա զբաղվել է մասնավոր խուզարկուական գործունեությամբ:
Անցյալ տարվա հուլիսի 7-ին Վլադիմիր Թուրաբյանին մեղադրանք առաջադրվեց, ընտրվեց ստորագրություն չհեռանալու մասին խափանման միջոցը:
Վլ. Թուրաբյանի պաշտպանը հանրային պաշտպանի գրասենյակից է՝ ՀՀ փաստաբանների պալատի անդամ Վարդան Գրիգորյանը: Ըստ նրա բողոքի, իր պաշտպանյալի գործով կան չփարատված կասկածներ, որոնք հնարավորություն չեն տալիս ապացուցված համարելու ամբաստանյալին առաջադրված մեղադրանքը:
Վլ. Թուրաբյանին մեղադրում են ապօրինի, մարդու անձնական, ընտանեկան գաղտնիք համարվող տեղեկություններ հավաքելու համար: Մասնավորապես, խոսք էր գնում Նոր Նորքի զինկոմիսարիատում պահվող Գ.Ա.-ի անձնական գործի մասին: Ըստ պաշտպան Վ. Գրիգորյանի. «Դատարանն անդրադարձավ իմ այն պատճառաբանությանը, թե Վլ. Թուրաբյանին մեղադրանք է առաջադրվել առանց պարզելու, թե զինկոմիսարիատում պահվող անձնական գործերի փաստաթղթերից որոնք են գաղտնի տեղեկություններ պարունակում, սակայն գտավ, թե դրանք անհիմն են»:
Ըստ բողոքաբերի, դատարանը ճիշտ չի կիրառել քրեական օրենքը՝ իրավաբանորեն ճիշտ չի որակել արարքը, կամայական մոտեցում է ցուցաբերել ապացույցներին, ինչպես նաեւ ներքին համոզմունքը ձեւավորել է զուտ ենթադրություններից ելնելով:
Անդրադառնալով Գ. Ա.-ի գործին, պաշտպանական կողմը հարցնում է՝ արդյոք այն պարունակո՞ւմ էր անձնական եւ ընտանեկան գաղտնիք համարվող տեղեկություններ, թե՝ ոչ, արդյոք Թուրաբյանը լուսանկարե՞լ է՝ հղում անելով ՀՀ քրեական դատավարության օրենսգրքի 18 հոդվածի 2-4-րդ մասերին: Ըստ վերոհիշյալի, կասկածյալը կամ մեղադրյալը պարտավոր չէ ապացուցել իր անմեղությունը, մեղադրանքի ապացուցման պարտականությունը դրված է մեղադրանքի կողմի վրա:
«Իմ պաշտպանյալը Գ. Ա.-ի անձնական գործը զինվորական կոմիսարիատում ուսումնասիրելով՝ տեղեկացել է այնպիսի գործողությունների մասին, որոնք բաց են եղել հանրության համար: Որեւէ անձնական գաղտնիք չեն պարունակում անձի անձնագրում կամ ծննդյան վկայականում տեղ գտած տեղեկությունները: Դրանք չի կարելի համարել անձի անձնական կյանքի անձեռնմխելիության խախտում»,- ասում է պաշտպանը:
Բողոքաբեր կողմը պահանջում է անմեղ ճանաչել Վլադիմիր Թուրաբյանին եւ բեկանել դատավճիռը:
ՌՈՒԶԱՆ ՄԻՆԱՍՅԱՆ
Հ. Գ. Հայաստանում այս գնով գործ չեն սարքում: Թուրաբյանին մեղադրել էին, թե իբր շոգեբաղնիքում բռնացրել է չինովնիկներին՝ իրենց սիրուհիների հետ, թե պատվերներ է ընդունել՝ որսալ անորսալին, թե նրա դեմ բոլոր դռները բաց էին: Սակայն ոչ չինովնիկը դատարան եկավ, ոչ՝ սիրուհին, ոչ տուժող տեսանք, ոչ՝ առերեսվող:
«Առավոտ» օրաթերթ
