«Ես չեմ ուզում խորանալ սոցիոլոգիայի մեջ, որպեսզի սոցիոլոգների հացը չկտրեմ, բայց ասեմ, որ ավելի շատ վստահում եմ Ահարոն Ադիբեկյանի թվերին, երբ ինքն ասում է, որ հիմնական առաջատարը Հանրապետական կուսակցությունն է, հետո գալիս է «Բարգավաճ Հայաստանը», եւ այս երկուսի մի քիչ մեծ կտրվածքից հետո հետեւում են ՀԱԿ-ը եւ ՕԵԿ-ը, ապա՝ Դաշնակցությունը, գուցե նաեւ «Ժառանգությունը»: Սա նշանակում է՝ կոալիցիան, եւ ապա մյուսները: Իսկ թե հետո ով ում հետ դաշինք կկազմի եւ ում հետ կգա, դա իրենց խնդիրն է, այդպես է՝ մանրերը պետք է միանան հզորներին, որպեսզի պետությունը կարողանա եւ արտաքին քաղաքականություն վարել, եւ նորմալ տնտեսություն, որովհետեւ աշխարհում կա ընդամենը երեք ուղղություն՝ ձախեր, պահպանողականներ, լիբերալներ, չորրորդը ծայրահեղականներն են»,- «Առավոտի» հետ զրույցում ասաց ՀՀԿ փոխնախագահ, ԱԺ պատգամավոր Ռազմիկ Զոհրաբյանը:
«Առավոտ» օրաթերթ
