«Առավոտը» նախկինում գրել է Մակարավանքի խաչքարերի խնդրի մասին: Արդեն երկրորդ տարին է, ինչ հռչակավոր Մակարավանքի շրջակայքից տեղափոխված 6 խաչքար գտնվում է Իջեւան քաղաքի ծայրամասում գտնվող «Քարարտ» ՓԲԸ գրասենյակի շրջակա տարածքում:
Քարի արդյունահանմամբ եւ վերամշակմամբ զբաղվող «Քարարտ» ձեռնարկության տնօրեն Կարեն Գիշյանը մի տարի առաջ պատմական արգելոց-թանգարանների եւ պատմական միջավայրի պահպանության Տավուշի մարզային ծառայության ուղարկված գրությամբ հայտնել էր. «Մակարավանքի վանական համալիրի տարածքից «Քարարտ» ՓԲԸ-ի տարածք է տեղափոխվել 6 (վեց) խաչքար, ռեստավրացիոն աշխատանքների համար: Խաչքարերը պետք է հետ վերադարձվեն Մակարավանքի վանական համալիրի տարածք»:
Մեկ տարի է անցել, սակայն խաչքարերը դեռ գտնվում են «Քարարտի» տարածքում: Մեկ տարի անց Կարեն Գիշյանը մեզ ասաց, որ իրենք խաչքարերը տեղափոխել են ոչ թե Մակարավանքի շրջակայքից , այլ` աչաջրեցիների բակերից եւ գոմերից, որ իրենք սրբությունները այդ կերպ փրկել են ոչնչացումից: Կարեն Գիշյանն երկու տարի է, ինչ հանդիսանում է Մակարավանքի խաչքավորը: Նա ասաց, որ իրենց ձեռնարկության միջոցներով Մակարավանքի տանիքի տակը ցելոֆանով պատվել է, որպեսզի տեղումներից տաճարի տանիքը չփլվի: Նրա խոսքերով, եթե պատմական արգելոց-թանգարանների եւ պատմական միջավայրի պահպանության Տավուշի մարզային ծառայությունն իրենցից պահանջի այդ խաչքարերը, իրենք կտրամադրեն դրանք: Իսկ այդ ծառայության տնօրեն Ռաֆիկ Մուրադյանն ասաց, որ այդ հարցով զբաղվել են, սակայն «Քարարտը»դեռեւս չի վերադարձրել խաչքարերը: Նրա վկայությամբ` Մակարավանքը պատկանում է Հայ առաքելական եկեղեցուն, սակայն մշակույթի նախարարության ենթակայութամբ գործող իրենց հիմնարկությունը եւս Մակարավանքի հոգեւոր արժեքները պահպանելու գործառույթ ունի: Ռաֆիկ Մուրադյանի խոսքերով` «Քարարտում» պահպանվող 6 խաչքարը ոչ թե աչաջրեցիների գոմերից եւ բակերից են «Քարարտ» տարվել, այլ` Մակարավանքի տարածքից: Արդյոք քարի արդյունահանմամբ եւ վերամշակմամբ զբաղվող մասնավոր հիմնարկը խաչքարերի պահպանության լավագույն տե՞ղն է :
Կարդացեք նաև
Ոսկան Սարգսյան
