Դորենկոն` կոմունիստ ժամանակներում
Դորենկոն` «հեռուստաքիլլեր» ժամանակներում...
«Նորությունների ռուսական ծառայության» (“Русская служба новостей”) գլխավոր խմբագիր Սերգեյ Դորենկոն հայտարարել է Ռուսաստանի Կոմկուսից դուրս գալու մասին: Այդ որոշման մասին նա տեղեկացրել է «Ֆեյսբուքի» իր էջում:
Դորենկոն գրել է, որ կուսակցությունից դուրս գալու մտադրություն է ունեցել դեռ 2011 թ. աշնանից: Սակայն «անբարոյական» է համարել այն ժամանակ հայտարարել այդ մասին, քանի որ Կոմկուսի ղեկավար Գենադի Զյուգանովը պետք է մասնակցեր նախագահական ընտրություններին:
Ինչ վերաբերում է կուսակցությունից դուրս գալու պատճառներին, ապա Դորենկոն ասել է, որ դուրս է գալիս, քանի որ «կուսակցականությունը ինքն իրենով դառնում է ծիծաղելի եւ անհեթեթ»: Կուսակցականներին ուղղված մի քանի սարկաստիկ ակնարկներից բացի Դորենկոն Զյուգանովին «վախկոտ» է անվանել եւ մեղադրել է Կոմկուսը «թաղելու» մեջ: Նաեւ հայտարարել է, որ կուսակցական անդամավճարի գումարները, որ նա նախկինում փոխանցում էր Կոմկուսի գանձարանին, այժմ կփոխանցի «Վիքիփեդիային», քանի որ «Վիքիփեդիան անհամեմատելիորեն ավելի կարեւոր եւ օգտակար է իմ երկրում կյանքը կարգավորելու համար, քան Կոմկուսը»: Սերգեյ Դորենկոն, որը մեծ ճանաչում ստացավ 1999-ին` որպես «հեռուստաքիլլեր», Կոմկուսի անդամ է դարձել 2003 թվականից:
