Այսօր՝ ՀՀ Սփյուռքի նախարարությունում կայացավ Հայկական Սփյուռքի վիրտուալ թանգարանի՝ armdiasporamuseum.com կայքէջի շնորհանդեսը: Ծրագրի նպատակն է ներկայացնել հայ ժողովրդի պատմությունը՝ աշխարհասփռյուռ հայ ժողովրդի եւ Հայաստանի Հանրապետության միջեւ կապի շեշտադրման միջոցով հաստատելով «Հայերը մեկ ազգ են՝ անկախ բնակության վայրից, եւ բոլոր հայերի հայրենիքը Հայաստանն է» գաղափարը:
Շնորհանդեսին բացման խոսքով հանդես եկած ՀՀ Սփյուռքի նախարար Հրանուշ Հակոբյանը նկատեց , որ իրականություն դարձած եւս մեկ համահայկական ծրագրի շնորհիվ էլեկտրոնային հարթակի վրա հնարավորություն ստեղծվեց ի մի բերել Սփյուռքի տարբեր կազմակերպությունների գործունեությունը եւ հայկական մշակութային արժեքները. «Այն, ինչ ցաքուցրիվ տվեցին թուրքերը, ժամանակի ընթացքում բարձրացվեց տարբեր երկրներում հաստատված ժողովրդի կողմից, որը պահպանեց իր ազգային ավանդույթները: Հայի հետքն այնտեղ է, որտեղ կա հայը»,-նշեց նախարարը: Տիկին Հակոբյանը հավելեց, որ էլեկտրոնային թանգարանի խորհրդապատկերը՝ նուռը, խորհրդանշում է հայկական աշխարհը, իսկ դրա հատիկները՝ հայերին:
Նշենք, որ էլեկտրոնային թանգարանում կարող ենք տեղեկատվություն գտնել Սփյուռքի հայ համայնքների պատմության եւ ներկայիս գործունեության, հայկական եկեղեցիների եւ հուշարձանների, Հայ Առաքելական եկեղեցու թեմերի մասին: «Հայկական գենեոլոգիա» բաժնում ներառված է «Հայկական տոհմածառ» ծրագիրը, որի նպատակն է ՝ հետազոտությունների միջոցով ստեղծել համահայկական տոհմածառ:
Ինչպես նշեց «Հայկական տոհմածառի» հիմնադիրներից Լիլիթ Մակարյանը, ծրագիրը հայ ընտանիքներին օգնում է գտնել կորցրած հարազատներին. «2007թ.-ից ի վեր կազմել ենք շուրջ 1600 ընտանիքի տոհմածառերը: Դրանցից ամենահնի պատմությունը սկսվում է 1959թ.-ից, իսկ ամենամեծ տոհմածառն ունի 965 անդամ»:
Կարդացեք նաև
Հավելենք, որ եռալեզու՝ հայերեն, անգլերեն, ռուսերեն Հայկական Սփյուռքի էլեկտրոնային թանգարանն առաջիկայում կթարգմանվի նաեւ արեւմտահայերենով: Ծրագրի իրականացման համար պետբյուջեից հատկացվել է 6 մլն դրամ:
Լուիզա ՍՈՒՔԻԱՍՅԱՆ
