«Հավատանք, որ փոխենք»-ն առաջին մեսիջն էր` ուղղված հենց դահլիճում նստած հանրապետականներին»,- այսօր «Հայելի» ակումբում ՀՀԿ-ի նոր կարգախոսն այսպես մեկնաբանեց «Նոր ժամանակներ» կուսակցության նախագահ Արամ Կարապետյանը: Ըստ նրա, Սերժ Սարգսյանն ուզում էր հանրապետականներին ասել, որ «Եթե դուք չեք հավատում, բա մնացածից ի՞նչ եք ուզում: Այսինքն, եթե դուք նաեւ ասում եք, որ երկիրը երկիր չի, կապիտալը տանում եք դուրս, երբ որ պետք է` կնոջը խփում եք, հետո մենք պիտի հարցերը լուծենք, պապը ինչ–որ խորհուրդ էր տվել չխմող մարդուց հեռու մնալ եւ այլն, հենց նրանց էր վերաբերում: Այսինքն, եթե դուք օրենքը չեք պահում, ի՞նչ ասես»:
Այն, որ այդ կարգախոսը Օբամայի կարգախոսի թարգմանությունն է եւ հիշեցնում է նաեւ ՀՅԴ-ի` 2003-ի կարգախոսը, ՀՀԿ պատգամավոր Մանվել Բադեյանը դրա մեջ վատ բան չի տեսնում. «Թե ոնց է մշակվել այդ կարգախոսը եւ ով է հեղինակը, ես չգիտեմ: Ես չեմ հաստատ, բայց համաձայն եմ դրա հետ: Պետք չի Օբամայից թարգմանել` խնդիրները կարող են նույնը լինել: Երբ Օբաման է ուզում բարեփոխումներ, դա լավ է, իսկ եթե Սարգսյանն է ուզում բարեփոխումներ, դա անպայման վա՞տ է»:
Արամ Կարապետյանի ընկալմամբ` կարգախոսները ծնվում են այդ օրվա օբյեկտիվ իրականությունից, Օբամայի դեպքում այն ճիշտ էր, որովհետեւ ինքը եկել էր փոխելու իրենից առաջ մեկ այլ կացութաձեւ. «Իսկ Սերժ Սարգսյանի կարգախոսը օգտագործվում է 14 տարվա իր իշխանության ընթացքում, այսինքն՝ սրա բացատրությունը չկա: Այս կարգախոսը ընդդիմության կարգախոս է»:
Կարդացեք նաև
Մանվել Բադեյանի համոզմամբ` փոխվելու կոչը վերաբերում էր ե’ւ ասողին, ե’ւ բոլորիս. «Բոլորս էլ փոփոխվելու ենք, չկա մարդ, որ ասի` ես 10 տարի առաջ նույնն էի, ինչ հիմա»:
Aravot.am-ի հարցին, թե դուք, օրինակ, ի՞նչ եք պատրաստվում փոխել ձեր մեջ` պարոն Բադեյանը պատասխանեց. «Ես էլ, իհարկե, իմ մեջ պիտի փոխեմ: Այն, ինչ իմ մեջ հասունացել է, հիմա դրսեւորվելու հնարավորություները ավելի մեծ են` լինել ավելի շատ կոնֆորմիստ: Ես հոգեբանորեն ինձ միշտ վատ եմ զգացել կոնֆորմիզմի դրսեւորման ժամանակ եւ հիմա այն, ինչ պետք է փոխեմ իմ մեջ, պետք է լինեմ ավելի աննկուն, անկոտրուն: Կոպիտ ասած, ես իմ մեջքին արդեն զգում եմ քաղաքական հենարան եւ ուժ, որպեսզի այդ ճանապարհով գնանք»:
Հռիփսիմե ՋԵԲԵՋՅԱՆ
