Այսօր Aravot.am-ի հետ զրույցում երգչուհի Շուշան Պետրոսյանը հաստատեց այն տեղեկությունը, որ պահանջվող փաստաթղթերն արդեն ներկայացրել է ՀՀԿ-ին անդամագրվելու համար եւ առաջիկայում էլ իրեն տեսնում է խորհրդարանում:
Հետաքրքրվեցինք՝ ինչպե՞ս է պատկերացնում իր օրենսդիր գործունեությունը, ի՞նչ է անելու խորհրդարանում: «Էն, ինչ–որ միշտ անում եմ, կռվելու եմ բոլորի հետ»,– կատակով ասաց երգչուհին: Քիչ անց էլ հավելեց. «Դեռ չգիտեմ՝ ինչ եմ անելու»:
Նա ասաց, որ իրեն բարկացրել է մամուլում եղած այն մեկնաբանությունը, թե իրենց գերդաստանից անպայման մեկը պետք է ԱԺ-ում լինի. «Ես ի՞նչ կապ ունեմ ուրիշ մարդու (նկատի ունի հորաքրոջը՝ Ալվարդ Պետրոսյանին.-Գ. Հ) հետ: Փառք Աստծո, իմ կյանքում միշտ ինքս եմ ինչ–որ բաների հասել, իմ որեւէ ծրագրի իրականացման համար ինչ–որ մեկին չեմ դիմել, ի՞նչ կապ ունի այդ մարդն ինձ հետ, երբ անգամ շփման եզր չունեմ հետը»:
Մեր այդ դիտարկմանը, որ արվեստագետը պետք է ազատ լինի, իսկ կուսակցական ցուցակով խորհրդարանում հայտնվելն արդեն իսկ կաշկանդող է, Շուշան Պետրոսյանը պատասխանեց. «Նայած ում, ստրկամիտներին առանց դրա էլ կարելի է կաշկանդված համարել, եթե մարդ ազատություն ունի, իրեն ոչինչ չի կարող կաշկանդել: Պիտի մասնակցեմ խնդիրների (խորհրդարանում), որոնք ինձ հուզում են, միեւնույն է՝ առանց երդումների եւ կուսակցական բաների ես ամեն ինչ կատարում եմ որպես քաղաքացի, դրանք պայմանականություններ են: Կարեւորը՝ մարդ իր սկզբունքներին չդավաճանի»:
Կարդացեք նաև
Օրերս կայացած ասուլիսում իր՝ Նժդեհից խոսելը պատահականությո՞ւն էր, թե՞ յուրօրինակ «անոնս»՝ ՀՀԿ-ին անդամագրվելու: «Հատուկ չեմ խոսել…ուղղակի վստահ չեմ, որ այդ անունը անընդհատ խաղարկող մարդիկ ծանոթ են Նժդեհին, նրա գրվածքներին, նամակներին, իսկ ես առիթ եմ ունեցել ներկայացում բեմադրելուց ծանոթանալ նրա նամակներին: Իսկապես մեծ փիլիսոփա ենք ունեցել, որը բացի ռազմի գործիչ եւ ստրատեգ լինելուց, եղել է նվիրյալ մարդ իր հայրենիքին եւ չհասկացված իր ժամանակակիցներից: Ես էն ժամանակ դեռ չգիտեի, որ մի օր սառույցը պիտի շարժվի, ինքս չդիմանալով բողոքներին՝ փորձեմ մտնել էդ համակարգի մեջ»,-հայտնեց երգչուհին:
Իսկ ինչո՞ւ հենց ՀՀԿ-ին որոշեց անդամագրվել եւ ոչ թե, ասենք՝ ՕԵԿ-ին, ԲՀԿ-ին կամ ՀՅԴ-ին: Ի պատասխան՝ Շուշան Պետրոսյանն ասաց՝ չեմ ասի, որ ասեմ՝ կգրեք:
Գոհար ՀԱԿՈԲՅԱՆ
