«Լրագրողներ առանց սահմանների» իրավապաշտպան կազմակերպությունը երկուշաբթի օրը հրապարակել է «Ինտերնետի թշնամիներ» զեկույցը:
Ըստ «Ամերիկայի ձայն» ռադիոկայանի՝ զեկույցում ներկայացած ցանկում ներառվել են պետություններ, որոնք խոչընդոտներ են ստեղծում համացանցում խոսքի և արտահայտման ազատության համար, ինչպես նաև սահմանափակում են մուտքը դեպի ինտերնետ:
«Լրագրողներ առանց սահմանների» կողմից կազմված ցանկը ներառում է այնպիսի պետություններ, ինչպիսիք են Չինաստանը, Մյանման և Հյուսիսային Կորեան, սակայն ցանկում որպես «ինտերնետի թշնամիներ» նշվել են նաև Ֆրանսիան և Ավստրալիան:
«Ինտերնետի թշնամիներ» ցանկում որպես «հսկողության տակ» հայտնված պետություններ այս տարի հիշատակվել են Ռուսաստանն ու Թուրքիան:
Կարդացեք նաև
Ըստ իրավապաշտպանների, Ռուսաստանն ներառվել է ցանկում՝ բրոգերների ձերբակալությունների և «ծայրահեղական» կայքերը փակելու պատճառով:
«Վարչակարգի քարոզչությունն ինտերնետում գնալով է՛լ ավելի մեծ տարածում է գտնում: Առկա է ինտերնետը քաղաքական վերահսկողության գործիքի վերածելու վտանգ», – նշում են իրավապաշտպանները:
«Լրագրողներ առանց սահմանների»-ի կողմից հրապարակված զեկույցում նշվում է, որ Թուրքիայում քննարկման համար արգելված թեմաները, որոնք հիմնականում վերաբերվում են Աթաթուրքին, բանակին, փոքրամասնություններին, հիմնականում՝ հայերին և քրդերին, ինչպես նաև «ազգային պատվին» վերաբերվող թեմաներին արդեն իսկ դարձել են մի քանի հազար կայքի, այդ թվում՝ «YouTube»-ը արգելափակելու պատճառը:
«Լրագրողներ առանց սահմանների»-ի իրավապաշտպան կազմակերպության կողմից հրապարակված զեկույցում որպես Թուրքիայում իրականացվող «առցանց ահաբեկչության» օրինակ է ներկայացվել 2007 թվականին սպանված թուրքահայ լրագրող Հրանտ Դինքի կողմից հիմնադրված «Ակոս» թերթի կայքի աշխատանքի խաթարումը, որն իրականացվել է 2010 թվականին՝ Դինքի սպանությունն իրագործողների համախոհների կողմից:
