HayNews.am-ի լրագրողը զրուցել է Արթիկի փոխքաղաքապետ Գեւորգ Փթուկյանի հետ, որն անցած խորհրդարանական ընտրություններին ներկայացված է եղել այդ կուսակցության համամասնական ցուցակում: Վերջինս տեղեկացրել է, որ ինքն ավելի քան 9 ամիս է՝ դուրս է եկել ՕԵԿ-ից եւ այլեւս որեւէ ընդհանուր բան չունի այդ կուսակցության հետ. «Ես հասկացա, որ այդ կուսակցությունը միայն իր ղեկավարների համար է: Անցած ընտրություններին Արթուր Բաղդասարյանն Արթիկում առաջինն էր, անգամ հաղթեց նախագահ Սերժ Սարգսյանին, հսկայական աշխատանք տարվեց, սակայն հասկացել եմ, որ ՕԵԿ-ում նման բաները չեն գնահատվում»: Ի դեպ, HayNews.am-ի տեղեկություններով, ՕԵԿ-ի Արթիկի կառույցից դուրս են եկել շուրջ 150 կուսակցականներ, առաջիկայում ՕԵԿ-ը կլքեն նաեւ Արթիկի մի քանի հարակից գյուղերի ՕԵԿ-ական գյուղապետեր:
Aravot.am-ի հետ զրույցում ՕԵԿ փոխնախագահ Հեղինե Բիշարյանն ասաց, որ Գեւորգ Փթուկյան անուն-ազգանունով մարդու ինքը չի ճանաչում, ապա հերքեց, որ 150 մարդ լքել է ՕԵԿ-ը. «Նման լուրեր տարածողներին էլ ասեմ՝ հերիք է կախվեք ՕԵԿ-ից: Էդպիսի բան չկա, ՕԵԿ-ից դուրս եկողներ չեն եղել»:
Նելլի ԳՐԻԳՈՐՅԱՆ
