Երեկ ուշ երեկոյան հայտնի գործարար, «Շիրակ» ֆուտբոլային ակումբի սեփականատեր Արման Սահակյանը, հանդիպելով լրագրողներին, պաշտոնապես հայտարարեց, որ պատրաստվում է ԱԺ ընտրություններում իր թեկնածությունն առաջադրել Գյումրիից: Ավելին, նա լրագրողներին հետաքրքիր ընտրապայքար խոստացավ:
Նշենք, որ խոշոր հարկատուն մեծամասնական ընտրակարգով իր թեկնածությունն առաջադրելու է թիվ 34 ընտրատարածքում, այսինքն մրցակցելու է ԱԺ պատգամավոր, ԲՀԿ Շիրակի մարզային կառույցի պատասխանատու Մարտուն Գրիգորյանի հետ: Արման Սահակյանին սատարելու է ՀՀԿ-ն, վերջերս գործարարը հայտարարել էր, որ ինքը ևս պատրաստվում է անդամակցել այս կուսակցությանը:
Aravot.am-ը պարոն Սահակյանից հետաքրքրվեց, թե ինչո՞ւ է անդամակցում ՀՀԿ-ին, նժդեհյան գաղափարախոսությո՞ւնն է նրան գրավում, թե՞ պարզապես իրեն պարտավորված է զգում իշխող կուսակցության վերաբերմունքից: «Դեռ չեմ ընդգրկվել ՀՀԿ-ի շարքերը: Հանրապետական կուսակցությունը, ինչպես գիտեք, պաշտպանում է իմ թեկնածությունը ,և կարծում եմ, որ նրանք հարմար են գտել այն ծրագրերը, որ ես ունեմ, փորձեն իմ միջոցով իրականացնել Գյումրիում: Եվ բնականաբար, ես էլ կարծում եմ, որ Հանրապետական կուսակցության հետ ավելի մեծ խնդիրներ կարելի է լուծել, ես ի նկատի ունեմ Հանրապետական կուսակցության ամբողջ ներուժը, դա համարում եմ շատ կարևոր հանգամանք մեծ խնդիրներ լուծելու հարցում»,- ասաց Արման Սահակյանը:
Aravot.am-ի այն հարցին էլ , թե ինչպե՞ս կմեկնաբանի մամուլում հրապարակված այն տեղեկությունները, թե խորհրդարանը փորձում են երիտասարդացնել Սերժ Սարգսյանի փեսայի` Միքայել Մինասյանի ընկերների հաշվին, Արման Սահակյանը պատասխանեց. «Առավոտ» օրաթերթից շատ շուտ՝ մի քանի տարի առաջ , ինձ նմանատիպ հարց են տվել, ես էլ ասել եմ` այո, Միքայել Մինասյանը իմ ընկերն է, և շատ տարբեր մարդիկ են իմ ընկերները»:
Կարդացեք նաև
Լրագրողներից մեկի այն հարցին էլ, թե ճի՞շտ են արդյոք այն տեղեկությունները, որ Արման Սահակյանը համատեղ բիզնես ունի նախագահի փեսայի հետ, գործարարը պատասխանեց. «Այդպիսի տեղեկատվությունը սխալ է, չունենք համատեղ բիզնես»:
Նունե ԱՐԵՎՇԱՏՅԱՆ
