Ռուսաստանյան ընդդիմությունը շաբաթ օրը անցկացրեց հերթական արտոնված հանրահավաքը, որին տարբեր տվյալներով մասնակցել է 10-30 հազար մարդ:
Տարբեր շարժումների, կուսակցությունների ղեկավարներ եւ ներկայացուցիչներ եւ պարզապես շարքային մոսկվացիներ եկել էին իրենց անհամաձայնությունն արտահայտելու մարտի 4-ին կայացած նախագահական արդյունքների հետ:
Հանրահավաքում ելույթներ ունեցան մարդիկ, ովքեր դիտորդներ էին եղել մարտի 4-ին. նրանք պատմում էին ընտրախախտումների մասին: Ելույթ ունեցավ «Յաբլոկո» կուսակցության ղեկավար Գրիգորի Յավլինսկին, ով ասաց, որ պայքարը դեռ երկար է տեւելու, սակայն իրենք հասնելու են նրան, որ Ռուսաստանում լինեն փոփոխություններ:
Ինչպես միշտ այսօր էլ ամենատարածված կարգախոսներն ու պաստառները Վլադիմիր Պուտինի հետ էին կապված` «Պուտին, հեռացիր, «Պուտին, քո ժամանակը սպառվել է» եւ այլն:
Կարդացեք նաև
Հանրահավաքի մասնակիցները տարբեր տարիքի մարդիկ էին, սակայն չկար դեկտեմբերյան հանրահավաքների ոգեւորությունը: Սակայն «Ձախ ճակատ» շարժման համակարգող Սերգեյ Ուդալցովն ասաց, որ մայիսին փողոց դուրս կգա մեկ միլիոն մարդ:
«Պուտինի երդման արարողությունից առաջ մենք միլիոնավոր մարդկանց դուրս կհանենք փողոց եւ այն ժամանակ ամեն ինչ կփոխվի, մենք միեւնույն է հաղթելու ենք», – հայտարարեց Ուդալցովը, ում, ի դեպ, հանրահավաքից հետո ոստիկանները ձերբակալեցին, քանի որ պատրաստվում էր երթ կազմակերպել դեպի Պուշկինսկայա հրապարակ:
Մոսկվայի կենտրոնը լեփ-լեցուն էր ոստիկաններով եւ հանրահավաքից հետո ոստիկանները պահանջեցին, որ հավաքվածները հեռանան:
Այսօրվա հանրահավաքի մասնակիցները պահանջեցին խորհրդարանական եւ նախագահական նոր ընտրություններ անցկացնել, ինչպես նաեւ ազատ արձակել քաղբանտարկյալներին:
Ընդդիմադիրները հասկանում են, որ այս բողոքի ալիքին նոր շունչ եւ նոր ռազմավարություն է անհրաժեշտ, դրա համար էլ նրանք «թայմ աութ» են վերցնում եւ պատրաստվում են դուրս գալ փողոց երկու ամսից` մայիսի 1-ին:
«Երբ տաք կլինի եւ մարդիկ տուն չեն վերադառնա, կմնան հրապարակում` վրաններում կամ առանց վրանների, բայց մենք մեր ուզածին կհասնենք. նոր ընտրություններ, արդար ընտրություններ կլինեն», – հայտարարեց ձախ դաշտի առաջնորդ Սերգեյ Ուդալցովը:
Ազա Բաբայան
«Ազատություն» ռադիոկայան
