Այսօր լրագրողները Գյումրի ժամանած բնապահպաններից հետաքրքրվեցին, թե ինչպե՞ս կմեկնաբանեն իրենց հասցեին աջ ու ձախ հնչող այն քննադատությունները, թե նրանք շարժվում են այս կամ կուսակցության հրահրմամբ կամ գրանտով: Բնապահպաններից մեկը` լուսանկարիչ Եղիա Ներսիսյանն, այսպես արձագանքեց. «Առաջին հերթին ինձ թվում է հայ մարդը պետք է մի անգամ Նժդեհ կարդա իր կյանքում և հասկանա` ոնց որ Նժդեհն էր ասում ` իմ կուսակցությունը իմ ժողովուրդն է : Անտարբերությունը համատարած հիվանդություն է Հայաստանում, և պակասում է հավատը ինչ-որ խնդիրների նկատմամբ, եթե ինչ-որ մեկը անում է հանունի համար ինչ-որ բան, պարտադիր իրեն պիտակ են կպցնում` ասում են ինքը անպայման պետք է գրանտ ուտի: Իրենք չեն հավատում, որ մեկը կարող է իր տունը թողնի, ելնի, գնա Թռչկանում վրանի տակ մնա, մտածում են պետք ա փող առնի էնտեղ: ՉԷ, կան բաներ, ինչպես որ Նժդեհն էր ասում` ապրել կամ զոհվել, եթե թշնամին մտնում է մեր Հայաստանը գրավելու, բոլորը զինվում են, գնում ենք կռիվ անելու, հիմա թշնամի չունենք, բայց ներքին թշնամին մեզ ուտում է, մեր ընդերքը տանում են, հետո կհայտնվենք անապատում, ինչու՞ չպայքարենք:Դա էլ է չէ՞ հանուն, մեզ անպայման պիտի փող տա՞ն կամ կուսակցական պիտի լինե՞նք, որ մեր երկիրը պահենք:Մեր երկիրը տանում են , էդպես չէ՞:Եթե կա այս աշխարհում մեկը, ով կհայտնվի ու մեր բնապահպաններից մեկին կասի, որ դու էս կուսակցության անդամ ես կամ քեզ փող են տվել, ես իրա աչքը կհանեմ:Թող մեկը ապացուցի, բոլորը խոսում են, փորձում են կեղտոտել, բայց մենք ոչ մեկից չենք վախենում: Եթե մեկը գա, ձեր ծորակի ջուրը կեղտոտի, դուք հաստատ նրա գլուխը կջարդեք, էսօր քո ամբողջ ջուրն են թալանում, քո ամբողջ երկիրն են կեղտոտում, ինչի՞ չեք պայքարում: Ի՞նչ կուսակցություն, խնդալու է, որ Հայաստանում էսքան կուսակցություն կա , մեզ ոչ մի կուսակցություն պետք չէ, մեզ պետք է տեր կանգնել մեր երկրին»:
Արթուր Գրիգորյանն էլ հավելեց, որ թեև բնապահպանների մեջ կան տարբեր կուսակցությունների անդամներ, բայց նրանք բնապահպանական շարժման մեջ մտել են ոչ թե կուսակցության շահը առաջ տանելու, այլ ընդհակառակը` քաղաքական միավորի հնարավորությունները օգտագործում են բնապահական պրոբլեմները առաջ մղելու համար, այնպես որ այնտեղ չկա կուսակցականություն:
Նունե ԱՐԵՎՇԱՏՅԱՆ
