Կոտայքի մարզի ընդհանուր իրավասության դատարանը 11 տարվա ազատազրկման է դատապարտել Հրազդանի բնակիչ Ն. Կիրակոսյանին: Նա, ըստ գործի նյութերի, 4 տարի առաջ նախնական համաձայնության էր եկել իր ծանոթներ Վ. Հովհաննիսյանի, Ա. Հեպոյանի, Կ. Թոռչյանի եւ Հ. Թորոսյանի հետ՝ ոսկյա իրերի առեւտրով զբաղվող Է. Գրիգորյանից հափշտակություն կատարելու շուրջ:
Ավազակային հարձակման եղանակով հափշտակությունը կատարելու համար նրանք դերաբաշխում էին կատարել, ձեռք էին բերել դիմակներ, ինքնաձիգ եւ մուրճ: Համաձայն նախապես մշակված ծրագրի՝ նրանք դարանակալել էին Հրազդանի Միկրոշրջան թաղամասի 106-րդ եւ 107-րդ շենքերի մոտ: Ըստ գործով ձեռք բերված ապացույցների. «Տեսնելով Է. Գրիգորյանի ավտոմեքենան՝ անմիջապես փակել են մեքենայի ընթացքի ճանապարհը եւ ինքնաձիգի գործադրմամբ ավազակային հարձակում գործել Է. Գրիգորյանի եւ նրա որդի Կ. Գրիգորյանի նկատմամբ: Բացելով մեքենայի դռները՝ մեքենայի հետեւի նստելատեղի վրայից վերցրել են կոշիկի տուփերում առկա առանձնապես խոշոր չափերի՝ 33 555 000 դրամ արժողությամբ տարբեր տեսակի ոսկյա զարդերն ու հեռացել»:
Հանցագործությունից հետո Ն. Կիրակոսյանը, Ա. Հեպոյանը եւ Կ. Թոռչյանը փախել էին: Նրանց նկատմամբ հայտարարվել է հետախուզում, իսկ որպես խափանման միջոց ընտրվել է կալանավորումը: Հետախուզման ժամանակ էլ պարզվել է, որ ՌԴ-ում գտնվող Կ. Թոռչյանը մահացել է:
ՌՈՒԶԱՆ ՄԻՆԱՍՅԱՆ
Կարդացեք նաև
«Առավոտ» օրաթերթ
