ՀՀ գլխավոր դատախազությանը պարբերաբար դիմում է Տավուշի մարզի Դիլիջան քաղաքի բնակչուհի Լիանա Գրիգորյանը:
Նրա օգտին տեղի ժողդատարանը 1995թ.-ին վճիռ է կայացրել, որը մինչ օրս չի կատարվում:
Լիանա Գրիգորյանին դաժան ծեծի էր ենթարկել Շահումյան փողոցի 12/5 տան բնակիչ, նախկինում դատված Գուրգեն Գեւորգյանը, որն այդ արարքի համար դատապարտվել էր 3 տարվա ազատազրկման: Լիանա Գրիգորյանը «Առավոտի» հետ զրույցի ժամանակ հայտնեց, որ ծեծի հետեւանքով ստացել է ծանր մարմնական վնասվածք, ոտքի սրունքի ոսկրի կոտրվածք: Ծեծն էլ կապված էր Գ. Գեւորգյանի կնոջ կողմից Լիանայի հասցեին արված չարախոսության հետ: Այդ կապակցությամբ Լիանան գնացել էր նրանց տուն: Կանանց վեճին միջամտել էր Գ. Գեւորգյանը: Դատարանը որոշել էր հօգուտ Լիանայի բռնագանձել 305 000 դրամ՝ որպես փոխհատուցում: Արգելանքի տակ դրվեց Գուրգեն Գեւորգյանի տունը, իսկ հարկադիր կատարողները նախ հայտնեցին, թե պարտապանը գրանցված չէ տվյալ տանը, ապա՝ թե նա իր անունով չունի անշարժ եւ շարժական գույք, այսինքն՝ անվճարունակ է:
Ըստ զրուցակցիս՝ պարտապանի երկրորդ բնակարան է տարվում նրա մայրը, որը ստորագրում է մի ակտի տակ, ըստ որի՝ պարտապանն, իրոք, ոչինչ չուներ: Մինչդեռ՝ «մորս ստորագրել են տվել ոչ թե վիճահարույց բնակարանում, որտեղ գրանցված էր Գուրգեն Գեւորգյանը, այլ՝ մի այլ բնակարանում, ուր իրեր չկային»:
Կարդացեք նաև
«Նկարագրելով պարտապանի ընտանիքի սոցիալ-տնտեսական ծանր կացությունը, ցուցաբերելով կարեկցանք, որը մարդասիրական է եւ գովելի, պատկան մարմիններն էլ չեն հոգում իմ մասին, չեն փաստում այն, որ ես ապրում եմ զույգ թոշակառու ծնողներիս հետ, միայնակ կին եմ, որ պարտապանն ինձ հասցրել է անաշխատունակության, եւ ես գտնվում եմ նյութական ծանր վիճակում»,- ասում է Լ. Գրիգորյանը:
Լիանա Գրիգորյանը նամակ է ուղարկել նաեւ արդարադատության նախարարին՝ նրան տեղեկացնելով, որ տարել է երկու ծանր վիրահատություն:
Իսկ այդ վիրահատությունների եւ ամբուլատոր բուժման ծախսերը հոգացել է ինքը՝ պարտքով վերցնելով ահռելի գումարներ:
Այդ պարտքերի պատճառով վտանգված է Լիանայի հայրական տունը, քանի որ դրանք չվերադարձնելու դեպքում կալանքի տակ կդրվի այն:
Գ. Գեւորգյանը մահանում է:
Դատարանի կողմից կարճվում է կատարողական թերթի հիման վրա հարուցված կատարողական վարույթը՝ պարտապանի մահվան կապակցությամբ:
Տավուշի մարզի դատախազության դատախազ Ա. Չիլինգարյանի 19.10.
2010թ. պաշտոնական պատասխանի համաձայն. «Շահումյան 13/4 բնակարանը հարկադիր աճուրդով չի օտարվել, քանի որ նշված բնակարանը հանդիսացել է հանգուցյալ պարտապանի կնոջ՝ Գ. Մարգարյանի ժառանգական գույքը, եւ վաճառվել է բնակարանի սեփականատեր Գ. Մարգարյանի կողմից»: Դատախազությունը նաեւ արձանագրել էր, թե «Լ. Մարգարյանը պարտապանի մահից հետո չի դիմել դատական պաշտպանության՝ դատական կարգով նրա պարտականությունների իրավահաջորդ ճանաչելու պահանջով»:
Իսկ թե ով եւ երբ կհատուցի Լիանային՝ հայտնի չէ:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
