Իրանի եւ Թուրքիայի արտգործնախարարները, արխիվ
Նախիջեւանում տեղի ունեցած Ադրբեջանի, Թուրքիայի եւ Իրանի արտաքին գործերի նախարարների եռօրյա հանդիպման արդյունքում եռակողմ հուշագիր է ստորագրվել, որտեղ անդրադարձ կա նաեւ Լեռնային Ղարաբաղի խնդրին:
«Կողմերը կարեւոր են համարում Լեռնային Ղարաբաղի հակամարտության շուտափույթ կարգավորումը` հիմնված ինքիշխանության, տարածքային ամբողջականության եւ պետությունների միջազգայնորեն ճանաչված սահմանները հարգելու վրա, եւ ընդգծում աջակցությունը տարածաշրջանի խաղաղությանն ու կայունությանը», – նշված է չորեքշաբթի օրը ստորագրված հուշագրում:
Թուրքական «Զամանը» գրում է, որ Թուրքիան, Ադրբեջանը եւ Իրանը կոնսենսուսի են եկել, որ Ղարաբաղի հակամարտությունը պետք է շուտափույթ լուծել: Ըստ թուրքական այդ պարբերականի մեկնաբանի՝ սա ուղիղ մեսիջ է Հայաստանին: Տարածաշրջանային կայունության համար նրանք ընդգծել են Ղարաբաղի խնդրի խաղաղ լուծման կարեւորությունը` շեշտելով, որ խնդրի լուծումը օգտակար կլինի ե՛ւ Հայաստանի, ե՛ւ Ադրբեջանի համար:
Ինչ վերաբերում է երեք երկրների միջեւ համագործակցությանը, ապա Թուրքիայի, Իրանի եւ Ադրբեջանի արտգործնախարարները բարգավաճ տարածաշրջան կառուցելու համար պատրաստակամություն են հայտնել խորացնելու առեւտրատնտեսական, տրանսպորտային, զբոսաշրջության, էներգետիկ ոլորտներում համագործակցությունը` քննարկելով նաեւ միմյանց միջեւ վիզային ռեժիմների դյուրացման հարցերը:
Կարդացեք նաև
Քննարկվել են նաեւ ավելի ընդհանուր հարցեր, ինչպես օրինակ` պայքարը ահաբեկչության, կազմակերպված հանցավորության, թմրանյութի, զենքի ապօրինի շրջանառության դեմ:
Հանդիպումից հետո կայացած մամուլի համատեղ ասուլիսում
Թուրքիայի արտգործնախարար Ահմեդ Դավութօղլուն ասել է. – «Մենք կարող ենք խաղաղ եւ բարգավաճ տարածաշրջան կառուցել Հարավային Կովկասում»:
Նա ասել է, որ Թուրքիան, Ադրբեջանն ու Իրանը արդեն կարեւոր քայլեր են կատարել տարածաշրջանային կապերը խորացնելու ուղղությամբ:
Իրանի արտգործնախարարը հաստատել է. – «Մենք երեք երկրներ ենք, երեք մարմիններ` մեկ հոգով: Սա անշուշտ արտացոլված է հուշագրում»:
Նրանք նշել են, որ երեք երկրները միասին ավելի քան 170 միլիոն բնակչություն ունեն, որը կարող է շատ խոշոր շուկա լինել:
Էլմար Մամեդյարովը, Ահմեդ Դավութօղլուն, Ալի Ակբար Սալեհին նաեւ երկկողմ հանդիպումներ են ունեցել: Իրանի արտգործանախարարի հետ հանդիպմանը Դավութօղլուն վերահաստատել է, որ Թուրքիան կարող է միջնորդի դեր ստանձնել Իրանի միջուկային ծրագրի շուրջ Արեւմուտքի հետ բանակցություններում:
Հրաչ Մելքումյան
«Ազատություն» ռադիոկայան
