Վերջերս Դուբայում (ԱՄԷ) տեղի ունեցավ «Դեղերի հայտնագործում եւ թերապիա» խորագրով 4-րդ միջազգային գիտաժողովը, վերջինիս շրջանակներում էլ՝ Կենսատեխնոլոգիայի առաջին միջազգային համաժողովը: Գիտաժողովին, որն ուներ 5000 մասնակից՝ 63 երկրից, Հայաստանից հրավիրված էր ՅՈՒՆԵՍԿՕ-ի ամբիոնի վարիչ, պրոֆեսոր Սիներիկ Հայրապետյանը՝ որպես առանցքային բաժիններից մեկի նախագահ եւ զեկուցող:
«Գիտաժողովը նվիրված էր երկրագնդի բնակչությանը ամենահուզող հարցերից մեկին՝ հիվանդությունների թվի աճին: Նպատակն էր քննարկել նրանց առաջացման, կանխարգելման եւ բուժման բնագավառներում միջազգային ձեռքբերումները: Գիտաժողովի կազմկոմիտեի նախագահն էր Նոբելյան մրցանակակիր Ֆերիդ Մուրադը, դասախոսություններով հանդես գալու համար հրավիրված էին նաեւ հայտնի դեղագործական կազմակերպությունների ղեկավարներ, անվանի գիտնականներ, այդ թվում՝ 7 Նոբելյան մրցանակակիր»,- «Առավոտի» հետ զրույցում նշեց պարոն Հայրապետյանը: Նա հավելեց, որ իր զեկուցումը վերաբերում էր քաղցկեղի առաջացման բջջային մեխանիզմներին. «Զեկուցմանս համար նյութ են հանդիսացել մեր կենտրոնի եւ հանրապետության վեց գիտական հիմնարկությունների աշխատակիցներից ձեւավորված կամավոր թիմի հետազոտությունների արդյունքները: Դրանք բացում են նոր հորիզոններ՝ հիվանդության արագ ախտորոշման եւ բուժման նոր մեթոդների մշակման համար»:
Մեր զրուցակիցը ցավով փաստեց, որ ՅՈՒՆԵՍԿՕ-ի ամբիոնի կարգավիճակ ունեցող իրենց կենտրոնի թեմաները պետության կողմից համարվում են ֆինանսավորման ոչ արժանի: Պարոն Հայրապետյանը տեղեկացրեց, որ առաջիկայում հրավիրված է Հնդկաստանում կայանալիք «Կենսահամատեղելիություն եւ կենսահամարժեքություն» խորագրով միջազգային 3-րդ համաժողովին:
«Ներկայումս մեր կենտրոնի ինժեներական խմբի կողմից մշակվում է քաղցկեղի արագ ախտորոշման գործիք: Ուռուցքաբանության կենտրոնի հետ էլ մշակվում է կլինիկական փորձարկումների աշխատանքային ծրագիր:
Կարդացեք նաև
Մեր թիմը պատրաստվում է դիմել երկրի ղեկավարությանը խնդրանքով՝ համարժեք օժանդակություն ցուցաբերել այդ ծրագրերի իրականացմանը, ինչը հնարավորություն կտա Հայաստանը դարձնել քաղցկեղի ուսումնասիրման տարածաշրջանային գիտաբժշկական կենտրոն: Մենք ունենք բոլոր տվյալները դրա համար: Մեզ արդեն այս ոլորտում առաջարկել են համագործակցել ֆրանսիացի, լեհ, չեխ, իրաքցի եւ արաբ գիտնականները»,- հավելեց պարոն Հայրապետյանը:
«Առավոտ» օրաթերթ
