Այսօր՝ մարտի 7-ին, ժամը 13.30-ի սահմաններում անգիտակից վիճակում Էրեբունի բժշկական կենտրոն է տեղափոխվել մի երիտասարդ։
Ինչպես «Առավոտին» հայտնում է ֆոտոլրագրող Գագիկ Շամշյանը, Էրեբունի բժշկական կենտրոն է մեկնել ոստիկանության Էրեբունու բաժնի օպերատիվ–քննչական խումբը։ Պարզվել է, որ վիրավորը բժշկական կենտրոն է տեղափոխվել Էրեբունի բժշկական քոլեջի մոտից՝ դանակահարված վիճակում։ Հիվանդանոց մեկնած ոստիկաններին բժիշկները հայտնել են, որ վիրավորն ի վիճակի չէ բացատրություններ տալու կատարվածի մասին։
Պարզվել է, որ դանակահարվածը Նոր Արեշ փողոցի բնակիչ, 18-ամյա Արմեն Մանուկյանն է։ Գ. Շամշյանը հայտնում է, որ ոստիկանությունն արդեն պարզել է որոշ հանգամանքներ և արդեն ունի տեղեկություններ, թե որտեղ և ով է դանակահարել Ա. Մանուկյանին։
Փաստի առթիվ ոստիկանության քննչական գլխավոր վարչության Էրեբունու քննչական բաժնում նյութեր են նախապատրաստվում քրեական գործ հարուցելու համար։ Ձեռնարկվում են օպերատիվ–քննչական միջոցառումներ՝ հայտնաբերելու դանակահարություն կատարող անձին:
