PHOTOLURE
«Ամենքինն ես, իմը չես,
Ամենքին ես սիրում դու,
Ա՛խ, ոսկով են գնում քեզ,
Անհաս ցնորք իմ հոգու…»,- տերյանական «Ցնորք»-ով այսօր` ԿԳ փոխնախարար Մանուկ Մկրտչյանն ուսուցիչներին շնորհավորեց
Կարդացեք նաև
Կանանց միջազգային օրվա կապակցությամբ` ԿԳ նախարարությունում կազմակերպված հանդիպման ժամանակ:
Ներկայացվեց նախարար Արմեն Աշոտյանի ուղերձը ուսուցիչներին եւ ուսանողուհիներին. «Ցանկանում եմ առողջություն, հաջողություն եւ երջանկություն: Թող ժպիտն ու կանացի հմայքը Ձեզ ուղակից լինեն ողջ կյանքում»:
Մ. Մկրտչյանը նշեց, որ արդար հասարակությանը բնորոշող մեկ չափանիշ կա. «Դա այն է, երբ մանկավարժները հասարակության վերին շերտն են համարվում: Ճիշտ է, մենք դեռեւս շատ հեռու ենք դրանից, քանի որ հասարակության վերաբերմունքն առայժմ այդպիսին չէ, բայց, համենայն դեպս, ձգտում ենք դրան»:
Երեւանի եւ մարզերի դպրոցների մի շարք վաստակավոր ուսուցիչներ արժանացան ԿԳՆ պատվոգրերի:
«Առավոտի» հետ զրույցում Ապարանի ավագ դպրոցի փոխտնօրեն, ինֆորմատիկայի ուսուցչուհի Լարիսա Միքաելյանը նշեց, որ կարեւոր է արժանանալ նման ուշադրության. «Հասկանում ես, որ աշխատանքիդ արդյունքը գնահատված է: Երբ քեզ են առանձնացնում կոլեկտիվից, ապա պարտավոր ես առավել մեծ պատասխանատվություն կրել»:
Լ. Միքայելյանը հավելեց, որ, ուսուցչի ամենակարեւոր` դաստիարակչական գործառույթին զուգահեռ՝ ավագ դպրոցի պարագայում կան որոշակի խոչնդոտներ. «Փորձում ենք ընտելանալ հոսքային ուսուցմանը: Երեխաները կարծես դեռ չեն հասկանում դրա իմաստը եւ առարկաների ընտրության հարցում դժվարանում են կողմնորոշվել, բայց ժամանակի ընթացքում աշխատում ենք լուծել այդ խնդիրները»:
Լուիզա ՍՈՒՔԻԱՍՅԱՆ
