Իջեւանի տարածաշրջանի չորս բնակիչներ 2010թ. դեկտեմբերի 31-ին, տարեմուտից մի ժամ առաջ դեղորայք էին տարել իրենց ընկերներից մեկի եղբորը, ով այդ զորամասում է ծառայում: Նրանց հանդիպել է զորամասի հրամանատար, գնդապետ Սերգեյ Կարապետյանը: Վերջինս զայրացել է նրանց այցից, հրամանատարի եւ երիտասարդների միջեւ վեճ եւ ընդհարում է եղել: Կարապետյանը նրանց բերման է ենթարկել իր աշխատասենյակ: Ահաբեկված տղաները ցատկել են նրա աշխատասենյակի` երկրորդ հարկում գտնվող պատուհանից: Դրա հետեւանքով 20-ամյա Տարոն Ենգիբարյանը գլխի ծանր վնասվածքներ էր ստացել, իսկ 21-ամյա Աշոտ Ուլիխանյանը՝ ձախ ոտքի կոտրվածք: Տարոնին տեղափոխել էին Իջեւանի հիվանդանոց, ապա Երեւանի «Սուրբ Գրիգոր Լուսավորիչ» բժշկական կենտրոն: 10 օր հետո, այդպես էլ գիտակցության չգալով, Իջեւան քաղաքի մերձակա Գետահովիտ գյուղի 20-ամյա բնակիչ Տարոն Ենգիբարյանը մահացել է: ՀՀ պաշտպանության նախարար Սեյրան Օհանյանի հրամանով Սերգեյ Կարապետյանն ազատվել է զբաղեցրած պաշտոնից, նա կալանավորվել է: 2011թ. դեկտեմբերի 8-ից Բերդում, Տավուշի մարզի առաջին ատյանի դատարանում ընթանում է այս գործով դատավարությունը: Մարտի 7-ին կայացած դատական նիստում շարունակվում էր գործով վկաների հարցաքննությունը: Գնդապետ Ս. Կարապետյանին ՀՀ քրեական օրենսգրքի մի քանի հոդվածներով, այդ թվում`սպանության փորձի,մեղադրանք է առաջադրված: Գնդապետն առաջադրված մեղադրանքներում իրեն մեղավոր չի ճանաչում:
Ոսկան Սարգսյան
