Մեկ շաբաթ առաջ Գյումրու հաց արտադրողները, հավաքվելով ու փոխադարձ համաձայնության գալով, մի գիշերվա մեջ 10-20 դրամով թանկացրել էին պաշտոնապես ընչազուրկ ճանաչված այս քաղաքի հացի գները, ինչը հարուցել էր շարքային գյումրեցիների վրդովմունքը: Գյումրեցիները ՀՀ կառավարությանը մեղադրում էին իրենց քաղաքն անտերության մատնելու ու ինքնահոսի թողնելու մեջ, ինչի հետեւանքով տնտեսվարողները ինչ ուզում՝ «սարքում» են շարքային սպառողների գլխին: Զանգվածային դժգոհություններից հետո կառավարության անդամները, հավանաբար զգալով, որ ընտրությունների նախաշեմին գյումրեցիների հետ նման «խաղեր» պետք չէ տալ, հացի փռի տերերին հրահանգեցին իջեցնել հացի գները: Երկու օր է՝ Գյումրիում առաջին անհրաժեշտության այս ապրանքատեսակը վաճառվում է նախկին գնով, մնում է միայն հացի քաշն ու որակը վերահսկվի: Վերջերս Գյումրու տեղական թերթերից մեկը, անդրադառնալով այս քաղաքում վաճառվող հացի որակին, նշել էր, որ սպառողը հացի միջից փնջով մազեր էր դուրս բերել:
ՆՈՒՆԵ ԱՐԵՎՇԱՏՅԱՆ
«Առավոտ» օրաթերթ
