Թուրքիա - Վարչապետ Ռեջեփ Էրդողանը իր գլխավորած «Արդարություն եւ զարգացում» կուսակցության խորհրդարանական խմբակցության հետ հանդիպման ժամանակ, Անկարա, 6-ը մարտի, 2012թ.
Թուրքիայի վարչապետի համոզմամբ, Ստամբուլի կենտրոնում` Խոջալուի իրադարձությունների 20-ամյակին նվիրված ցույցի ժամանակ հնչած հակահայկական կոչերն ու կարգախոսները «այլատյացության դրսեւորում էին»:
Հայերին ու Հայաստանը վիրավորող ու նսեմացնող կոչերի մասին Ռեջեփ Էրդողանը խոսեց դրանց ի հայտ գալուց գրեթե 10 օր անց` երեքշաբթի օրը Անկարայում «Արդարություն եւ զարգացում»կուսակցության խորհրդարանական խմբակցության անդամների հետ ամենշաբաթյա հանդիպման ընթացքում։
«Խոջալուի ջարդին նվիրված այդ հանրահավաքի ժամանակ ի հայտ եկած կարգախոսները մի քանի կատաղի ռասիստների, բայց ոչ թուրքական հանրության շրջանում տիրող տրամադրությունների արտացոլումն էին», – հայտարարում էր Էրդողանը` միաժամանակ պնդելով, թե սխալ է մի քանի կարգախոսի ու վանկարկման հիման վրա պատկերացում կազմել մի ողջ ցույցի մասին:
«Այդքան էլ ազնիվ չէ, երբ մի քանի լուսացքային ազգայնականների պատճառով փորձ է արվում այդ կոտորածին նվիրված հանրահավաքի վրա ստվեր գցել: Մի քանի անիմաստ պաստառի պատճառով չի կարելի խաթարել Թուրքիայի միջազգային հեղինակությունը», – ասաց Էրդողանը` նշելով, թե արդեն իսկ թուրք իրավապահները հետաքննություն են սկսել փաստի առթիվ. – «Անհրաժեշտ իրավական գործընթացներն արդեն իսկ մեկնարկել են»:
Կարդացեք նաև
Թուրքիայի ներքին գործերի նախարարությունը, ըստ «Ազատություն» ռադիոկայանի, դեռ անցած շաբաթ էր հանդես եկել հայտարարությամբ` նշելով, թե «հանրահավաքի ընթացքում տեղ գտած մի շարք վիրավորական բնույթի պաստառներն ու կարգախոսները որեւէ կերպ արդարացնել հնարավոր չէ»:
Այդ հանրահավաքին, սակայն, ներկա էր եւ ելույթ էր ունեցել նույն այդ ներքին գործերի նախարարության ղեկավարը` Էրդողանի մերձավոր զինակիցներից Իդրիս Նաիմ Շահինը:
«Այդ հանրահավաքի ժամանակ Շահինը դատարկ մի ճառով հանդես եկավ` պնդելով, թե 21-րդ դարը թուրքերինն է լինելու: Ինչն է սակայն ավելի կարեւոր` նախարար Շահինը բառ անգամ չգտավ ցույցին ռասիստական կարգախոսներով ներկա թուրք ֆաշիստներին դատապարտելու համար», – նկատում է հայտնի թուրք սյունակագիր Մուսթաֆա Ակյոլը:
Գեւորգ Ստամբոլցյան
