Ռուս մոդել Իրինա Շեյկը, որը Մադրիդի «Ռեալի» կիսապաշտպան Կրիշտիանու Ռոնալդուի հարսնացուն է, անհամբերությամբ է սպասում ֆուտբոլի Եվրո 2012-ի ավարտին: Բայց ավելի շատ ոչ այն պատճառով, որ պորտուգալացին պատրաստվում է այնտեղ հերոսանալ: Չելյաբինսկցի գեղեցկուհու մտահոգությունը Եվրոպայի առաջնության ավարտից 11 օր հետո՝ հուլիսի 12-ին, նշանակված իրենց հարսանիքն է, որը կայանալու է Մայդեյրայում եւ պետք է որ շքեղության ռեկորդներ գրանցի:
Սակայն իսպանական ԶԼՄ-ներն սկսել են կասկածել, թե նրանց հարսանիքն ընդհանրապես կկայանա: Բանն այն է, որ Ռոնալդուի մայրը՝ Դոլորես Ավեյրուն եւ ֆուտբոլիստի ընտանիքի մյուս անդամները չեն ընդունում Իրինային: Նրանց դուր չեն գալիս Շեյկի անկաշկանդ ֆոտոսեսիաները: Իսկ տիկին Դոլորեսը կարծում է, որ նա աչք է դրել իր որդու հարստության վրա:
Լրատվամիջոցների կասկածներն էլ ավելի խորացան «Ռեալ»-«Էսպանյոլ» խաղի ժամանակ: Նրանք հետեւել են, թե ինչ է կատարվում «Սանտյագո-Բեռնաբեու» ստադիոնի՝ Ռոնալդուի օթյակում, եւ պարզել, որ ամբողջ հանդիպման ընթացքում Իրինան եւ ապագա սկեսուրը գտնվել են օթյակի տարբեր անկյուններում եւ ոչ մի բառ չեն փոխանակել: Գեղեցկուհու ներկայությունը «չեն նկատել» նաեւ Ռոնալդուի ընտանիքի մյուս անդամներն ու հարազատները:
Աշոտ ՀԱԿՈԲՅԱՆ
