Երեւանի Փակ շուկայի տարածքում շինարարական աշխատանքներն այժմ դադարեցված են:
Շուկայի տնօրենի վստահված անձ Մարատ Ապինյանը «Մասքլիբերթիին» փոխանցեց, որ այժմ սպասում են Մշակույթի նախարարության եւ քաղաքապետարանի թույլտվությանը՝ շինարարությունը շարունակելու համար:
Մշակույթի նախարարության Պատմության եւ մշակույթի հուշարձանների պահպանության գործակալությունից «Մաքսլիբերթի»-ին տեղեկացրին, որ շուկայի սեփականատեր «Թիվ մեկ շուկա» ընկերությունն իրենց ներկայացրել է միայն շուկայի ստորգետնյա մասում շինարարություն կատարելու նախագիծ: Վերգետնյա մասում շինարարության մասին որեւէ նախագիծ ներկայացված չէ:
Որքա՞ն ժամանակ են շինարարական աշխատանքները դադարեցված լինելու հարցին` գործակալության ներկայացուցիչ Կարո Այվազյանը պատասխանեց. «Մինչեւ որոշում կայացնենք՝ տեսնենք՝ ինչ ենք անում: Նախագիծ պետք է ներկայացվի, այն քննարկվի եւ այլն: Այսօրվա դրությամբ չեմ կարող որեւէ կոնկրետ բան ասել»:
Հիշեցնենք, որ մարտի 2-ին քաղաքապետարանը արձանագրություն էր կազմել՝ վարչական պատասխանատվության ենթարկելով «Թիվ մեկ շուկա» ընկերությանը, որն առանց համապատասխան թույլտվության՝ շինության տանիքի փայտաշեն հատվածի փոխարինման աշխատանքներ էր կատարել:
Փակ շուկան ընդգրկված է պետության կողմից գրանցված մշակութային հուշարձանների ցանկում եւ առանց համապատասխան մարմինների թույլտվության շինարարական աշխատանքներ այնտեղ իրականացնել չի կարելի:
Կարո Այվազյանը տեղեկացրեց, որ պատմական հուշարձաններին վնաս հասցնելու չափի որոշման մասին օրենք չկա: Վարչական իրավախախտումների օրենսգրքի 154-րդ հոդվածը, որով պատասխանատվության է ենթարկվել «Թիվ մեկ շուկա» ընկերությունը, շենքեր եւ շինություններ ինքնակամ կառուցելու համար է պատասխանատվություն սահմանում: Ըստ այդմ` պատմամշակութային կառույցին վնաս հասցնելու մասին որեւէ արձանագրություն չի կազմվել եւ պատմամշակութային կառույց հանդիսացող Փակ շուկայում առանց թույլտվության շինարարություն իրականացնելու համար ընկերությունը կվճարի ընդամենը 200.000 դրամ տուգանք:
