Բազմիցս գրել ենք, որ Տավուշի մարզկենտրոն Իջեւանով հոսող Աղստեւ գետը փաստորեն դարձել է աղբատար հոսանք: Բազմիցս այդ հարցը քննարկվել է Տավուշի մարզխորհրդի նիստերում, մարզպետը տվել է Աղստեւը մաքուր պահելու հանձնարականներ, սակայն դրանք արդյունք չեն տվել:
Ինչպես տեղեկացնում է Տավուշի մարզպետարանի ինտերնետային կայքը (www.tavush.gov.am) փետրվարի 27-ին մարզպետ Արմեն Ղուլարյանը հերթական աշխատանքային խորհրդակցությունն է անցկացրել մարզպետարանի ստորաբաժանումների ղեկավարների հետ: Քաղաքաշինության վարչության գլխավոր մասնագետ Միքայել Ղալումյանը տեղեկատվություն է ներկայացրել քաղաքային համայնքներում իրականացվող աղբահանության աշխատանքների վիճակի մասին: Կայքում նշված է. «Մարզպետը հանձնարարեց մշտական հսկողության տակ պահել ինչպես նշված համայնքների աղբահանության, այնպես էլ մարզկենտրոնով հոսող Աղստև գետի մաքրության ապահովման աշխատանքները»: Մարզպետի այս հանձնարարականից մի շաբաթ անց եղանք Աղստեւի ափին եւ տեսանք, որ գետի աղտոտվածության վիճակն ավելի է վատացել:
Կարդացեք նաև
Մեր լուսանկարելու պահին էլ գետափնյա առեւտրի եւ սպասարկման օբյեկտներից շինարարական եւ այլ աղբ էին թափում Աղստեւ: Գետափնյա սրճարաներից մեկի տերը. իմանալով,որ լրագրող եմ, ասաց, որ 4 օր առաջ Իջեւանի կոմունալ ծառայության աշխատակիցները գետի ափերի մաքրման աշխատանքներ էին կատարում, սակայն օբյեկտներից շարունակում են աղտոտել, եւ մաքրված տեղը նորից աղբավայր է դառնում:
Աղստեւի մաքրությունն ապահովելու Տավուշի մարզպետի հանձնարարականները հիշեցնում են չինական «հերթական լուրջ նախազգուշացումները»: 1950-ական թվականների սկզբին ամերիկյան ռազմական ինքնաթիռները ազատ կերպով հետախուզական թռիչքներ էին կատարում կոմունիստական Չինաստանի օդային տարածքում: Չինաստանը հակաօդային պաշտպանության միջոցներ չուներ, եւ այդ երկրի արտգործնախարարությանը ԱՄՆ-ին հղում էր «1418-րդ լուրջ նախազգուշացումը»:
Ոսկան ՍԱՐԳՍՅԱՆ
