Ըստ Daily Mail-ի՝ Bedeck ընկերությունը հարցում է անցկացրել 2000 մարդու շրջանում, պարզելու համար, թե ինչ են անում մարդիկ քնելուց երկու ժամ առաջ: Հարցումների արդյունքները ցուց են տվել, որ մարդկանց մեծամասնությունը նախքան քնելը՝ գրեթե մեկ ժամ անցկացնում է հեռուստացույց նայելով:
Bedeck ընկերության ներկայացուցչի խոսքով, լավ քնի համար կարեւոր է, որ դրանից առաջ երկու ժամ շարունակ գրեթե ոչնչով չզբաղվել: Նրանք, ովքեր ամենալավ գիշերային քունն են ունենում, երեկոյան ժամը 9-10-ին՝ խմում են իրենց վերջին բաժակ թեյը, այնուհետեւ գնում քնելու:
Ըստ հարցման մասնակիցների մեկ երրորդի՝ լավ քնելուն օգնում է նաեւ քուն մտնելուց առաջ որոշ ժամանակ գիշերազգեստով հանգստանալը:
Հոգեբան Լիլիթ Սարգսյանի կարծիքով էլ, եթե նման մի հարցում Հայաստանում անցկացվեր, ապա հաստատ հարցված քաղաքացիների մեծամասնությունն, առանց տարիքային սահմանափակման, կպատասխաներ, որ քնելուց երկու ժամ առաջ համակարգչի առջեւ նստած է եղել. «Ավելի ճիշտ՝ կասեն, որ համակարգչից մի կերպ պոկվելով են անկողին մտել. ցավալի է, բայց շատ երիտասարդներ չգիտակցելով, թե ինչ վնաս են հասցնում իրենց առողջությանը, անգամ անկողնում պառկած են համակարգչից օգտվում: Քնում ու արթնանում են համակարգչի հետ միասին, չնայած այս դեպքում ասել թե քնում են, սխալ կլինի: Քանի որ համակարգչից կառչածները սովորաբար տառապում են անքնությամբ, կամ էլ՝ անհանգիստ քուն են ունենում: Իսկ հանգիստ քուն ունենալու համար, առնվազն մի քանի ժամ առաջ պետք է զերծ մնալ ամեն տեսակ տեխնիկայից, ուղղակի հանգստանալ հաճելի երաժշտություն լսելով, ընտանիքի անդամների, սիրելիների հետ զրուցելով, կարճ ասած՝ ինտիմ մթնոլորտում»:
Կարդացեք նաև
Եվա ՀԱԿՈԲՅԱՆ
