Ռուսաստանյան նախագահական ընտրություններին հետեւած ԵԱՀԿ-ի եւ Եվրախորհրդի խորհրդարանական վեհաժողովի միջազգային դիտորդները չեն կարծում, որ ընտրությունները արդար եւ թափանցիկ են անցել:
«Ռուսաստանյան իշխանությունները հավասար պայմաններ չէին ստեղծել բոլոր թեկնածուների համար, չկար իրական մրցակցությունը, իսկ վարչական ռեսուրսի չարաշահումը հանգեցրեց նրան, որ հաղթողը նախօրոք հայտնի էր», – հայտարարել են միջազգային դիտորդները:
Միաժամանակ ԵԽԽՎ-ի դիտորդական առաքելության ղեկավար Թինի Քոքսը, ըստ «Ազատություն» ռադիոկայանի, նշել է, որ այս ընտրությունները ավելի լավ են անցել, քան դեկտեմբերին կայացած Պետդումայի ընտրությունները:
Միջազգային դիտորդները կոչ են արել մանրամասն ուսումնասիրել ընտրախախտումների դեպքերը:
Այսօր առավոտյան Ռուսաստանի Կենտրոնական ընտրական հանձնաժողովը հայտարարել է, որ ձայների 64 տոկոսով հաղթել է Վլադիմիր Պուտինը:
