Դիլիջանի զինկոմիսարիատի մուտքի մոտ տեղադրված են հիմնարկի հայերեն եւ ռուսերեն լեզուներով ցուցանակներ: Քաղաքապետարանի շենքի դիմաց գտնվող հինգհարկանի շինության առաջին հարկում տեղակայված զինկոմիսարիատի մուտքի ապակուն փակցված հայտարարությունը զգուշացնում է. «Զինկոմիսարիատ բջջային հեռախոսներով մուտքը խստիվ արգելվում է»: Պարզաբանումներ ստանալու համար դիմեցի զինկոմիսարիատ: Դիլիջանի զինկոմ, մայոր Գնել Ափինյանի մոտ ինձ ուղեկցող ենթասպան պահանջեց անջատել բջջային հեռախոսս: Զինկոմ Ափինյանն ասաց,որ զինկոմիսարիատի տարածքում բջջային հեռախոսներ անջատելու հրամանը տրված է պաշտպանության նախարարի կողմից: Ցանկացա տեսնել այդ հրամանը, որովհետեւ հետաքրքիր էր` հրամանում գրված է ընդհանրապես բջջայիններով զինկոմիսարիատ մտնելու արգելքի՞, թե՞ զինվորական այդ հիմնարկ մտնելիս բջջային հեռախոսն անջատելու պահանջի մասին: Սակայն զինկոմ Ափինյանը նախարարի հրամանը չտրամադրեց, ասելով, որ այն գաղտնի է:
-Ինչո՞ւ մուտքին, ռուսերենից զատ, անգլերեն ցուցանակ չեք տեղադրել, չէ՞ որ անգլերենը միջազգային լեզու է:
– Դիլիջանում մոլոկաններ շատ կան, դրա համար էլ ռուսերեն ցուցանակ ենք տեղադրել,- պատասխանեց զինկոմը:
Մայորի աշխատասենյակում գտնվող, զինկոմիսարիատի աշխատակից մի սպա էլ հավելեց,որ Դիլիջան քաղաքի բնակչության 17 տոկոսը ռուսախոս է :
Կարդացեք նաև
Դիլիջանի քաղաքապետարանից ճշտեցի, որ անցյալ տարվա մարդահամարի տվյալներով՝ քաղաքի բնակչությունը կազմում է 19 600 մարդ: Քաղաքի ռուսախոս բնակիչները`մ ոլոկանները, ուկրաինացիները, ասորիները, հույները միասին 1000 հոգուց էլ պակաս են: Արժե՞ր նրանց համար ոռւսերեն ցուցանակ տեղադրել, այդ հարցը օրենքով չի կարգավորվո՞ւմ:
Ոսկան ՍԱՐԳՍՅԱՆ
