Լուսանկարը՝ Panarmenian-ի
«Պետրոս Մակեյանը չարության մոլուցքով տառապող անձնավորություն է, եւ պետք է օրինակ բերեմ մեր վաղամեռիկ Նազարյանին, որն ասում էր՝ նման կուսակցությունները մի տասը պասաժիր ունեցող կուսակցություններ են»,- Aravot.am-ի հետ զրույցում Պետրոս Մակեյանին այսպես հակադարձեց ՕԵԿ խմբակցության պատգամավոր Հեղինե Բիշարյանը: Հիշեցնենք, որ Պ. Մակեյանն այսօր մեզ հետ զրույցում ասել էր, թե 2008 թվականից հետո ՕԵԿ-ը որպես կառույց չի գործում ու իշխանությունները պահում են օգտագործելու համար:
Հ. Բիշարյանը ի պատասխան այս հայտարարությունների, ասաց. «Նրա կուսակցությունը վաղուց մահացած կուսակցություն է , իսկ «Օրինաց Երկիրը» հզոր ուժ է, որի շարքերում բազմահազարանոց մարդիկ են, ու բոլորը ամեն օր դրանում համոզվում են»: Ինչ վերաբերում է պարոն Մակեյանի դիտարկմանը, թե «Փորձում են 5 տոկոսի շեմը նկարագրել, եթե իրավիճակը հնարավորություն տվեց` 5 տոկոսն էլ կնկարեն», տիկին Բիշարյանը հավելեց. «Մակեյանները չեն որոշում, թե ՕԵԿ-ը ինչքան ձայն կհավաքի: Լավ կլինի ինքը իր կորած, մեռած կուսակցության մասին խոսի»: Իսկ թե ինչքան ձայն կհավաքի ՕԵԿ-ը առաջիկա ընտրություններում՝ տիկին Բիշարյանը վստահեցրեց. «Շա՝տ-շատ»:
Կարդացեք նաև
Արփինե ՍԻՄՈՆՅԱՆ
